कोहलपुर÷ बुधवार साँझ अवैध वालुवा उत्खनन गरेर लोड भएका ३ टिप्परलाई कोहलपुर प्रहरीले नियन्त्रणमा लिएको छ । बुधवार साँझ ७ बजेको समयमा राप्ती सोनारी गाउँपालिका कचनापुरमा रहेको राप्ती नदीबाट वालुवा उत्खनन गरेर टिप्परमा लोड गरेर लैजादै गरेको अवस्थामा इलाका प्रहरी कोहलपुरको टोलीले तीन वटा टिप्पर नियन्त्रणमा लिएको हो ।

अवैध रुपमा राप्ती नदी तटिय क्षेत्रबाट नदीजन्य पदार्थ बालुवा उत्खनन गरी लोड गरेर लैजादै गरेका भे१क १४३२, भे१ख ३५४२ र भे१ख ३२३१ नम्वरको टिप्परलाई नियन्त्रणमा लिएर अनुसन्धान भइरहेको कोहलपुर प्रहरीले जनाएको छ ।

यस क्षेत्र अन्र्तगतका नदी, खोला तथा सार्वजनिक जमिनमा अवैध रुपमा वालुवा, गिट्टी तथा माटो उत्खननका घटनामा बृद्वि हुँदै गएको जनगुनासो बढेपछि यस अनलाइन न्यूज पोर्टलले स्थलगत रिपोटिङ्ग गरेर समाचार प्रकाशित गरेको थियो । जिल्लाको राप्ती सोनारी, कोहलपुर र बैजनाथ क्षेत्रमा अवैध रुपमा नदीजन्य पदार्थ तथा माटो उत्खनन गरेर विक्री वितरण भइरहेको पाइएको थियो । समाचार प्रकाशित भएपछि सम्बन्धित निकायहरुले यसतर्फ चासो देखाउँदै निगरानी बढाएका थिए । कोहलपुर प्रहरीले श्रृष्टि सामुदायिक वन उपभोक्ता समितिभित्र पर्ने डुडुवा खोलाबाट अवैध रुपमा माटो उत्खनन गरेर विक्रीका लागि लोड भएका ५ वटा ट्याक्टर केहि दिन अघिमात्र नियन्त्रणमा लिएको थियो । यस्तै मानखोला डिगियाबाट अवैध रुपमा ग्राभेल उत्खनन गरी लोड भएको एक ट्याक्टरलाई प्रहरीले नियन्त्रणमा लिएर कारवाहीको लागि जिल्ला समन्वय समितिमा बुझाएको थियो ।

अहिले कुनै पनि खोला तथा नदीजन्य पदार्थको ठेक्का नखुलेको खण्डमा जति पनि नदिजन्य तथा माटोजन्य सामाग्री उत्खनन भइरहेको छ, त्यो सबै अवैध हुने भएकाले आफ्नो क्षेत्राधिकार पर्ने सबै खोला, नदी तथा सार्वजनिक जमिनमा निगरानी बढाएको इलाका प्रहरी कार्यालय कोहलपुरका प्रमुख रबिन्द्र खनालले बताएका छन् । साथै बुधवार नियन्त्रणमा लिएका ३ वटा टिप्परलाई विहिवार सार्वजनिक विदा परेकाले शुक्रवार कारवाहीका लागि जिल्ला समन्वय समितिमा पठाउने तयारी भइरहेको प्रहरीको भनाई छ ।