झापा, १० पुस 
रतुवामाई वृक्षरोपण आयोजनामा लगाइएको मसला जातको रुख कटान सुरु गरिएको छ । शिवसताक्षी नगरपालिका र कमल गाउँपालिकामा रहेको सो वनमा १५ वर्ष अवधि पुगेका मसलाका रुख कटान सुरु गरिएको हो ।    
    
 कार्यालयका सूचना अधिकारी भक्तिप्रसाद गौतमले नयाँ टिक जातका बिरुवा लगाउने योजना अनुरुप मसलाको रुख कटान गर्न थालिएको बताउनुभयो । उहाँले शिवसताक्षी नगरपालिका–१० पूर्वपश्चिम राजमार्ग उत्तर रहेका क्षेत्रका रुख धमाधम कटान गरिरहेको बताउनुभयो । दुई हजार ७५३ हेक्टर क्षेफलमा फैलिएको सो वनमा ५० हजार हेक्टरमा १५ वर्षअघि सिसौका रुख हटाएर मसला जातको विरुवा लगाइएको थियो ।    
    
 कटान गरिएको रुखमध्ये स्थानीय उपभोक्तालाई २५ प्रतिशत बिक्री गरिन्छ भने ५० प्रतिशतमा टेण्डर आह्वानद्वारा बिक्री गरिने उहाँको भनाइ छ । बाँकी रहेको २५ प्रतिशत वन पैदावर विकास समिति काठमाडौँलाई हस्तान्तरण गरिनेछ ।    
उहाँले मसला जातको काठको मूल्यभन्दा टिककोे मूल्य महँगो हुने र छिटो हुर्कने हुँदा कटान गरिएको क्षेत्रमा टिक जातको बिरुवा लगाउने बताउनुभयो । मसलाको काठको बजार मूल्य हाल प्रति क्यूफिट रु ३०० देखि ६०० सम्म रहेको उहाँले बताउनुभयो । वन क्षेत्रमध्येको १० प्रतिशत जमिनमा कदम, २० प्रतिशतमा टिक र १० प्रतिशतमा विभिन्न प्रजातिका रुख लगाइएको छ ।    
    
 उहाँले आयोजनाले ढलापढा रुख बेचेर मात्र वार्षिक रु एक करोड ५० लाख आम्दानी गर्दै आएको बताउनुभयो । उहाँले हाल वन क्षेत्रको ६३ हेक्टर जमिन भने अतिक्रमणको चपेटामा परेको जानकारी दिनुभयो ।