कोहलपुर / सार्वजनिक तथा सरकारी जमिन दोहन गरेर अवैध रुपमा माटोको विक्री वितरण भइरहेको समाचार यस अनलाइन पोर्टलमा प्रकाशन भएपछि सम्बन्धित निकायहरु एक्सनमा उत्रिएका छन् । जिल्लाको बैजनाथ गाउँपालिका अन्र्तगत विभिन्न स्थानमा रहेको सरकारी र सार्वजनिक जमिनमा माटो उत्खनन गरेर ट्याक्टर, ट्रिप्पर प्रयोग गरेर केही निर्माण व्यवसायी नै अवैध तरिकाले माटो विक्री गर्ने गरिरहेको समाचार प्रकाशित भएपछि नौवस्ता औद्योगिक क्षेत्र परियोजनाले निगरानी बढाउँदै अवैध माटो उत्खननमा प्रयोग भएको जेसिभि नियन्त्रणमा लिएको थियो ।

यस्तै कोहलपुर क्षेत्र अन्र्तगत पर्ने विभिन्न सामुदायिक वन तथा खोलाहरुमा मनपरी रुपमा माटो उत्खनन् भइरहेको सूचना पाएपछि शुक्रवार इलाका प्रहरी कार्यालय कोहलपुरको प्रहरी निरिक्षक सहितको टोलीले ५ वटा ट्याक्टर नियन्त्रणमा लिएको छ । कोहलपुर नगरपालिका अन्र्तगतको डुडुवा खोलासँगै रहेको श्रृष्टि सामुदायिक वन क्षेत्रमा अवैध रुपमा माटो उत्खनन गरेर विक्री गर्ने उद्देश्यले ट्याक्टरमा लोड हुँदै गरेको अवस्थामा प्रहरीको टोलीले ५ वटा ट्याक्टर नियन्त्रणमा लिएर कारवाही प्रक्रिया अगाडी बढाएको छ । श्रृष्टि सामुदायिक वन उपभोक्ता समितिका केही पदाधिकारीहरुको मिलेमतोमा स्थानिय निर्माण व्यवसायीले सामुदायिक वन क्षेत्रलाई दोहन गर्दै अवैध माटोको उत्खनन गर्ने काम भइरहेको समाचार श्रोतको दावी छ ।

यस विषयमा सामुदायिक वनका अध्यक्ष तारा बहादुर खत्रीले वन उपभोक्ताहरुको घर निर्माण प्रयोजनका लागि सामुदायिक वन क्षेत्रको माटो प्रयोग भएको तर विक्री प्रयोजनका लागि चाही नभएको बताए । सामुदायिक वनका उपभोक्ताले आवश्यक परे सो क्षेत्रको माटो प्रयोग गर्न पाउने निर्णय भएको समेत अध्यक्ष खत्रीले बताए । तर श्रोतका अनुसार अवैध माटो उत्खनन गरेर विक्री प्रयोजनमा मद्दत पु‍र्याउने उद्देश्यले वनका पदाधिकारीहरुले आफु अनुकुलको काम गरेको देखिन आउँछ ।

कोहलपुर र बैजनाथ गाउपालिका अन्र्तगतका सरकारी र सार्वजनिक जमिनहरुमा स्थानिय ठेकेदारहरुले अवैध रुपमा माटो उत्खनन गरेर विक्री वितरण गरिरहेको समाचार यस न्यूज पोर्टलमा सार्वजनिक भएपछि एक पछि अर्को नियामक निकायले चासो देखाउन थालेका हुन् ।

यस अघि वैजनाथ गाउँपालिका अन्र्तगत नौवस्तामा रहेको औद्योगिक क्षेत्र निर्माणस्थल, डिगिया, गाभर क्षेत्रबाट निर्वाध रुपमा निर्माण व्यवसायीले अवैध रुपमा माटो उत्खनन गर्दा पनि सरोकारवाल तथा नियामक निकाय मौन बस्दा सरकारी तथा सार्वजनिक जमिनको दोहन बढेको थियो । पछिल्लो समयमा नदीजन्य सामाग्री उत्खननमा रोक लागेपछि निर्माण व्यवसायीहरु अवैध माटो उत्खनन तथा भण्डारमा गिद्दे नजर बढाएको जनगुनासो बढेपछि न्यूज नमस्ते न्यूज पोर्टलले स्थलगत रुपमा रिपोटिङ समेत गरेको थियो ।

स्थलगत रिपोटिङ पछि प्रकाशित समाचार प्रभाव अनुसार नौवस्ता औद्योगिक क्षेत्र परियोजना पछि इलाका प्रहरी कार्यालय कोहलपुरले पनि चासो देखाउँदै निगरानी तथा गस्ती बढाएको जनाएको छ ।