प्रतिनिधि सभाको बैठक आज मङ्गलवार बस्दैछ । बैठक दिउँसो १ बजे बस्नेछ । संसद् बैठकअघि अहिले कार्यव्यवस्था परामर्श समितिको बैठक बसिरहेको छ ।

संसद् सञ्चालनका लागि आवश्यक छलफल गर्न समितिको बैठक बसेको हो । प्रमुख प्रतिपक्ष दल नेकपा एमालेले संसद् बैठकमा निरन्तर अवरोध गर्दै आएको छ । गएको मङ्गलवार पनि एमालेको अवरोधका कारण संसद् चल्न सकेको थिएन । एमालेले आफूले गरेको सांसदको कारबाहीलाई सभामुखले मान्यता नदिएको भन्दै विरोध गर्दै आएको छ । यसअघिको अधिवेशनमा पनि एमालेले अवरोध गरेको थियो ।

संसद्को अवरोध खुलाउन सत्ता गठबन्धनले निरन्तर प्रयास गर्दै आएको छ । तर अहिलेसम्म सहमति जुटेको छैन । प्रधानमन्त्री शेरबहादुर देउवाले अस्ति आइतवार सर्वदलीय बैठकमा संसद् नियमित गर्न दिन प्रमुख प्रतिपक्ष दल एमालेलाई आह्वान गर्नुभएको थियो । तर बैठकमा प्रमुख प्रतिपक्षी दल एमाले सहभागी भएन । आफूले कारबाही गरेका व्यक्ति समेटेर दर्ता भएको दल नेकपा एकीकृत समाजवादी सहभागी हुने बैठकमा आफूहरू सहभागी नहुने भन्दै एमालले सर्वदलीय बैठक बहिस्कार गरेको हो ।