काठमाडौं । राष्ट्रिय प्रजातन्त्र पार्टी (राप्रपा) को प्रथम एकता महाधिवेशनमा अध्यक्षमा उम्मेदवारी दिएर पराजित भएका कमल थापा निर्मल निवाससँग झन् आक्रोशित बनेका छन् ।

मंगलबार महाधिवेशनमा आफूलाई सहयोग गर्ने सबैलाई धन्यवाद दिँदै विज्ञप्तिमार्फत महाधिवेशनमा निर्मल निवासको योजनाअनुरुप आफ्नो राजनीति समाप्त पार्न खोजिएको भन्दै थापाले आक्रोश पोखे ।

उनले विज्ञप्तिमार्फत् भनेका छन्, ‘देशमा राजनीतिक, आर्थिक र सामाजिक रूपान्तरण गर्न सक्ने शक्ति वा राजनीतिक दलको रूपमा होईन, राप्रपालाई ‘भजन मण्डली’ बनाउने गलत नियत राखेर मलाई राजनीतिक रूपमा समाप्त पार्न खोजिएको तथ्य स्पष्ट छ । राप्रपालाई ‘भजन मण्डली’ बनाउने निर्मल निवासको योजना हामी कहिल्यै सफल हुन दिने छैनौँ।’

निर्मल निवासले पार्टीलाई रिमोट कन्ट्रोलले जसरी चलाएको थापाको आरोप छ । उनका अनुसार राजसंस्थाका बारेमा र पार्टीलाई रिमोट कन्ट्रोलबाट चलाउन चाहने निर्मल निवासको योजनाका बारेमा अब राप्रपा भित्र बहस सुरू हुनेछ ।

यसैगरी राप्रपाका निवर्तमान अध्यक्षसमेत रहेका थापाले पार्टीको महाधिवेशनमा पूर्वराजाबाट भएको हस्ताक्षेपले राजसंस्था पुनःस्थापना भए अन्य राजनीतिक दल र राजनीतिमा हस्ताक्षेप हुने पनि औँल्याएका छन् ।

‘अहिले शतप्रतिशत राजावादीहरू भएको पार्टीमा त राजाको ठाडो र फोहरी हस्तक्षेप (यस सम्बन्धी यथेष्ट प्रमाण हामीसँग सुरक्षित छ) हुन्छ भने भोलि राजसंस्था स्थापित हुँदा अन्य पार्टी र राजनीतिमा राजाको हस्तक्षेप हुँदैन भनेर भन्ने हाम्रो नैतिक धरातल समाप्त भएको छ,’ विज्ञप्तिमा भनेका छन्, ‘विगतमा झैँ राजाबाट प्रजातन्त्र र प्रजातान्त्रिक संस्थामा हस्तक्षेप हुँदैन भनेर अब हामीले कुन मुखले भन्ने ?’

थापाले निर्मल निवासले २०७४ सालदेखि नै राप्रपालाई फुटाउन खोजेको र भजन मण्डली खडा गरेर नेतृत्वको चरित्रहत्या गर्ने काम गरेको आरोप पनि लगाएका छन् ।

थापाले राप्रपाका अध्यक्षमा नवनिर्वाचित राजेन्द्र लिङ्देनसहित सबै पदाधिकारीहरुलाई शुभकामना दिएका छन् ।