भरतपुर, १८ मङ्सिर
भरतपुर महानगरपालिका–२६ स्थित दिव्यनगर खानेपानी आयोजनाको शिलान्यास गरिएको छ । आज नेकपा (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले आयोजनाको शिलान्यास गर्नुभएको हो ।    
    
आयोजनाको शिलान्यास गर्दै अध्यक्ष प्रचण्डले देशमा चितवनले विकासको मोडेल प्रस्तुत गरेको उल्लेख गर्दै धमाधम आयोजना शिलान्यास भइरहेको बताउनुभयो । चितवनमा हुने आर्थिक विकास राष्ट्रियरूपमा अध्ययन गर्ने विषय हुनुपर्ने उहाँको भनाइ थियो । जिल्लाको विकासका लागि स्थानीय, प्रदेश र सङ्घीय सरकारबाट करोडौँ बजेट विनियोजन भएको दाहालले जानकारी दिनुभयो ।    
    
रु २० करोड ९८ लाख ४१ हजार १८१ को लागतमा निर्माण हुन लागेको आयोजनाका लागि सरकारको ९० प्रतिशत र उपभोक्ताको १० प्रतिशत लगानी रहनेछ । आयोजना निर्माण गर्ने जिम्मा भीमेश्वर डिलिङ तथा निर्माण सेवाले पाएको छ । सम्झौताअनुसार आयोजनामा ४५० घनमिटरको एउटा ओभरहेड ट्याङ्की, कार्यालय भवन, गार्ड हाउस, १२६ किमी पाइप जडान, एक हजार ८५५ धारा जडान आगामी २०८० असार ७ गतेभित्रमा सम्पन्न गर्नुपर्ने दिव्यनगर खानेपानी तथा सरसफाइ उपभोक्ता संस्थाका अध्यक्ष तुलाराम आचार्यले जानकारी दिनुभयो ।     
    
कार्यक्रममा भरतपुर महानगरपालिकाका प्रमुख रेनु दाहालले भरतपुरमा तीव्र विकास भइरहेको उल्लेख गर्दै कालोपत्र र ग्राभेलमा कायापलट गरेको जिकिर गर्नुभयो । उहाँले महानगरको एक मात्र उद्देश्य विकास निर्माण रहेकाले आवश्यकताका आधारमा हरेक क्षेत्रमा बजेट विनियोजन गरेको बताउनुभयो ।    
    
भरतपुर–२६ का वडाध्यक्ष ज्ञानप्रसाद खनालले दिव्यनगर खानेपानी आयोजना निर्माणपछि एक हजार ८५५ घरधुरीले शुद्ध खानेपानी पाउने बताउनुभयो । धेरै समयको मेहेनतपछि आयोजना शिलान्यास भएको भन्दै उहाँले खुशी व्यक्त गर्नुभयो ।    
–––