कोहलपुर : नेपाली कांग्रेसको १४ औं महाधिवेशन अन्तर्गत कोहलपुर नगरमा विरेन्द्रकुमार शाहको पदाधिकारी प्यानल निर्वाचित भएको छ । सभापतिमा निकटतम प्रतिद्वन्दी राजेन्द्र श्रेष्ठलाई शाहले १६ मत अन्तरले पराजित गरेका हुन् ।  

शाह संस्थापन इतर पक्षका र श्रेष्ठ संस्थापन (देउवा) पक्षका हुन् । सभापतिमा निर्वाचित भएका शाहले १ सय ६० र श्रेष्ठले १ सय ४४ मत प्राप्त गरेको मतदान अधिकृत (अधिवक्ता) प्रभाकर भट्टराईले जानकारी दिएका छन् । यस्तै उपसभापतिमा निर्वाचित भएका भरत शर्मा र सुशील सापकोटाले समान १६७ मत ल्याए । 

दुबैका निकटतम प्रतिस्पर्धी चेतकान्त भट्टराईले १३९ र अंशुमान चौधरीले १२८ मत ल्याए । सचिवमा पनि शाह पक्षका गोविन्द वाग्ले र बालकुमार शर्माले समान १८१ मत प्राप्त गरे । उनका निकटतम प्रतिस्पर्धी भूमबहादुर भण्डारीले १३२ मत र भुपेन्द्र शाहीले १०६ मत ल्याए  । 

सहसचिवमा निर्वाचित भएका महेशकुमार चौधरीले १७७ र रामु लम्सालले १५० मत प्राप्त गरेका छन् । निकटतम प्रतिस्पर्धी कृष्णकुमार पुन मगरले १३८ र कमल बहादुर शाहीले १२९ मत ल्याएको मतदान अधिकृत भट्टराईले बताए । उनका अनुसार पदाधिकारीको मत गणना सम्पन्न भइसकेको र अब वडाबाट प्रतिनिधित्व गर्ने र समानुपातिक समावेशी तथा खुल्ला सदस्यको गणना गर्न बाँकी छ ।