कोहलपुर/ दिन प्रतिदिन आलोचित बन्दै गइरहेको जिल्ला ट्राफिक प्रहरी कार्यालयले इट्टा भट्टा उद्योगहरुबाट मासिक रकम असुली गर्ने गरेको रहस्य पनि उजागर भएको छ । विहिवार अपरान्ह हवल्दारपुरमा ट्राफिक प्रहरीको सवारी छड्के चेकजाँच चलिरहेको बेला मासिक रकम नबुझाएको झोकमा चेकजाँचमा खटिएका ट्राफिक कर्मचारीले एक इट्टा भट्टा सञ्चालकको ट्याक्टर केही समय नियन्त्रणमा समेत लिएका थिए । तत्काल ट्याक्टर चालकले इट्टा भट्टा सञ्चालकलाई यस विषयमा जानकारी गराउँछन् र सञ्चालकले एक व्यक्तिलाई ३ हजार ५ सय रुपैयाँ दिएर ट्राफिक चेकजाँच स्थलमा पठाउँछन् र उनलै ट्राफिक कर्मचारीलाई रकम बुझाएपछि ट्राफिकले नियन्त्रणमा लिइराखेको ट्याक्टर छाडिदिन्छन् ।

कोहलपुर हाइस्कूलमा रहेको ट्राफिक पोष्टमा हरेक महिना सो क्षेत्र अन्र्तगत सञ्चालनमा आएका इट्टा भट्टाहरुले मासिक रुपमा तोकिएको रकम ट्राफिक प्रहरीलाई नबुझाएको खण्डमा आवश्यक कागजपत्र तथा चालकको सवारी चालक अनुमति पत्र हुँदा पनि विभिन्न वहानामा समस्या सिर्जना गर्ने हुँदा मासिक रुपमा ३ हजार देखि माथि रकम बुझाउँदै आएको नाम प्रकाशन नगर्ने शर्तमा एक इट्टा भट्टा सञ्चालकले बताए । हामी इट्टा भट्टा व्यवसायीहरुलाई ट्राफिक प्रहरीले विशेष निगरानी राखिरहेको हुन्छ, ट्राफिक पोष्ट रहेको स्थानको राजमार्ग हामीले दिनमा धेरै पटक प्रयोग गर्नुपर्ने हुन्छ, हाइस्कूलमा रहेको ट्राफिक पोष्टमा रहेका ट्राफिक प्रहरीले मासिक रकम नबुझाएसम्म हामीले निर्वाध रुपमा इट्टा ढुवानी गर्नै मुस्किल छ त्यसैले हामी मासिक रकम बुझाउन बाध्य छौ अर्का इट्टा भट्टा सञ्चालकले पीडा पोखे ।

कोरोनाकालमा सबै प्रकारका व्यवसाय धरापमा परेको बेला इट्टा भट्टा उद्योगहरु पनि मारमा परेका छन्, तर ट्राफिक प्रहरीलाई बुझाउनुपर्ने मासिक रकम नबुझाउनुपर्ने भएका भए एउटा मजदुरको चुलोमा आगो बल्ल मद्दत पुग्ने थियो, हामी विवश भएर ट्राफिकलाई मासिक रकम बुझाउन बाध्य छौ उनले भने । किन माथिल्लो निकायमा ट्राफिक प्रहरीको ज्यादती विरुद्व उजुरी नगरेको भन्ने प्रश्नमा ती व्यवसायी भन्छन् “हामीले माथिल्लो निकायमा उजुरी गरेको खण्डमा राजमार्गमा अनावश्यक समस्या सिर्जना गरेर इट्टा ढुवानी गर्ने सवारी सडकमै रोकिन्छन् कि भन्ने त्रासका कारण हामी पीडित छौ ।”

यस विषयमा जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक यन बहादुर मल्लसँग मोवाइलमा सम्पर्क गर्दा यस विषयमा अहिलेसम्म उजुरी आएको छैन, तपाई नै उजुरी लिएर आउनुस् म कारवाही गर्छु, फोनमा कुरा नगर्नुस कार्यालयमा आएर बसेर कुरा गर्नुस् भन्दै जंगिए । प्रहरी निरीक्षक मल्लले बाँके ट्राफिक प्रमुखको जिम्मेवारी पाएपछि आफ्नो कार्यकालमा सवारी दुर्घटना समस्या समाधानका लागि प्रतिबद्व रहेको प्रतिक्रिया दिएका थिए । उनले आफुले जिम्मेवारी पाउनु अघि जिल्लाको ट्राफिक व्यवस्थापन तथा कार्यसम्पादन कसरी हुन्थ्यो, त्यो थाहा नभएको तर आफ्नो कार्यकालमा कुनै पनि सवारी तथा सवारी चालकबाट अनुचित रकम आफ्नो मातहतका कर्मचारीहरुले नलिने गरी निर्देशन दिइसकेको बताउँदै सवारी दुर्घटना न्यूनिकरण तथा ट्राफिक व्यवस्थापन गर्ने क्रममा कुनै पनि आचार संहिता विपरित कार्य नहुने उनले प्रतिबद्वता जनाएका थिए ।