बागमती प्रदेशकी मुख्यमन्त्री अष्टलक्ष्मी शाक्यले विश्वासको मत नलिई राजीनामा दिने भएकी छन् । 

प्रदेश सभामा बुधवार विश्वासको मत लिने तयारी थियो । विश्वासको मत नलिई राजीनामा दिने तयारी गरेको एमालेका प्रदेश सांसद केशवप्रसाद पोखरेलले लोकान्तरलाई जानकारी दिए । विश्वासको मत पाउने सम्भावना नदेखिएपछि शाक्यले राजीनामा गर्न लागेकी हुन् । 

नेकपा एमाले विभाजन उन्मुख भएको बेला भदौ २ गते शाक्य बागमती प्रदेशको मुख्यमन्त्री बनेकी थिइन् । सरकारमा सहभागी दल विभाजन भएपछि विश्वासको मत लिनुपर्ने संवैधानिक व्यवस्था छ । शाक्यले गत कात्तिक ४ गते प्रदेश सभामा विश्वासको मतसम्बन्धी प्रस्ताव पेश गरेकी थिइन् । 

अष्टलक्ष्मीले राजीनामा गरेपछि नेकपा एसका राजेन्द्र पाण्डे मुख्यमन्त्री बन्ने तयारी छ । केन्द्रमा सत्ता गठबन्धनमा रहेका नेपाली कांग्रेस, माओवादी केन्द्र र नेकपा एसबीच पाण्डेलाई मुख्यमन्त्री बनाउने सहमति भएको छ । 

आलोपालो सरकारको नेतृत्व गर्ने गरी कांग्रेसका ईन्द्र बानियाँ ७ महिनापछि मुख्यमन्त्री बन्ने गरी तयारी भएको गठबन्धनको दाबी छ ।