न्यायाधीशहरूको अवज्ञाका कारण सोमवार र मंगलवार सर्वोच्च अदालतमा कुनै मुद्दाको सुनुवाइ नभए पनि प्रधानन्यायाधीश चोलेन्द्रशमशेर जबराले बुधवारका लागि पेशी तोकेका छन् ।

जबराले आफ्नो छुट्टै इजलास गठन गरेका छन् भने संवैधानिक इजलास पनि राखेका छन् । 

वरिष्ठतम् न्यायाधीश दीपक कार्की, मीरा खड्का, हरिकृष्ण कार्की र विश्वम्भरलाल श्रेष्ठ सम्मिलित संवैधानिक इजलासमा गणेश हमालले प्रधानमन्त्री तथा मन्त्रिपरिषद् कार्यालयविरुद्ध दायर गरेको रिटको निर्णय सुनाउने (निसु) छ । जबराको एकल इजलासमा केही बन्दी प्रत्यक्षीकरणका मुद्दा छन् । 

प्रधानन्यायाधीशले राजीनामा गर्नुपर्ने मागसहित सर्वोच्च अदालतका न्यायाधीशहरूले इजलास बहिस्कार गरेर सोमवार र मंगलवार छलफल गरेका थिए । मंगलवार प्रधानन्यायाधीशको राजीनामा माग गरेका न्यायाधीशहरू बुधवार पनि छलफलमा छन् । 

मन्त्रिपरिषद्मा भागबण्डा खोजेको, न्यायालयमा विकृति भित्राएको भन्दै न्यायाधीशहरूले प्रधानन्यायाधीशको राजीनामा माग गरेपछि सर्वोच्च अदालतमा सुनुवाइ प्रभावित भएको छ । कानून व्यवसायीको छाता संगठन नेपाल बारले पनि प्रधानन्यायाधीशको राजीनामा माग गरेको छ । 

प्रधानन्यायाधीशले तत्काल राजीनामा नगरे आन्दोलनका कार्यक्रम घोषणा गर्ने बारले चेतावनी दिएको छ ।