कोहलपुर/ राजमार्गमा सवारी व्यवस्थापन, सवारी नियम उल्लंघन गर्ने सवारी चालकलाई सचेत तथा कारवाही एवम् विशेष गरी सवारी दुर्घटना न्यूनिकरणको अहम जिम्मेवारी पाएको ट्राफिक प्रहरीले सवारी चेकजाँचलाई कमाइखाने माध्यमका रुपमा उपयोग गर्ने गरेको भन्दै धेरै ठाउँमा ट्राफिक प्रहरी आलोचित बन्दै आएको छ ।

बाँके जिल्लामा पनि ट्राफिक प्रहरीको कार्यसम्पादनका विषयमा बेला बेलामा आलोचित बन्दै आइरहने गर्छ । सामाजिक सञ्जाल, सञ्चार माध्यममार्फत प्रहरीको आचरण र चेकजाँचको नाममा ट्राफिक प्रहरीले सवारीबाट रकम असुली सम्बन्धमा निरन्तर समाचार प्रकाशन प्रशारण हुने गरेको छ । प्रहरी निरीक्षक यन बहादुर मल्लले बाँके ट्राफिक प्रमुखको जिम्मेवारी पाएपछि केही दिन अघि आफ्नो कार्यकालमा सवारी दुर्घटना समस्या समाधानका लागि प्रतिबद्व रहेको प्रतिक्रिया दिएका थिए । उनले आफुले जिम्मेवारी पाउनु अघि जिल्लाको ट्राफिक व्यवस्थापन तथा कार्यसम्पादन कसरी हुन्थ्यो, त्यो थाहा नभएको तर आफ्नाे कार्यकालमा कुनै पनि सवारी तथा सवारी चालकबाट अनुचित रकम आफ्नाे मातहतका कर्मचारीहरुले नलिने गरी निर्देशन दिइसकेको बताउँदै सवारी दुर्घटना न्यूनिकरण तथा ट्राफिक व्यवस्थापन गर्ने क्रममा कुनै पनि आचार संहिता विपरित कार्य नहुने उनले प्रतिबद्वता जनाएका थिए ।

यस न्यूज पोर्टलले कोहलपुर क्षेत्र अन्र्तगतका ट्राफिक पोष्टहरुमा गरेको स्थलगत रिपोटिङ्गका क्रममा ट्राफिक प्रमुखको निर्देशन निर्देशनमै सिमित रहेको पाइएको छ । यस न्यूज पोर्टल सम्बद्ध पत्रकारको टोलीले मंगलवार कोहलपुर हाइस्कूल, चप्परगौडी, सम्शेरगञ्ज, मदनचौक, सम्झना र चिसापानीमा रहेका ट्राफिक पोष्टहरुको फिल्ड रिपोटिङ्ग गरेको थियो ।

फिल्ड रिपोटिङ्गका क्रममा अधिकांश ट्राफिक पोष्टमा कार्यरत ट्राफिक कर्मचारीहरुले सवारी चेकजाँच पछि नियम उल्लंघन गर्ने सवारी चालक तथा सवारीहरुबाट रकम बुझ्दै गरेका तस्बिरहरु क्यामरामा कैद भएका छन् । विशेष गरी मोटरसाइकल, अटो रिक्सा, साना तथा मझौला सवारी, यात्रुवहाक सवारीहरुबाट ट्राफिक कर्मचारीहरुले प्रति सवारी एक सय देखि सवारीको वर्ग अनुसार रकम बुझ्ने गरेको पाइएको छ ।

नाम प्रकाशन नगर्ने शर्तमा एक सवारी चालकले ट्राफिक प्रहरीले अनावश्यक झन्झट सिर्जना गर्ने भएकाले एक सय रुपैयाँ दिएपछि कुनै चेक जाँच नहुने बताए । उनले हरेक पटक नेपालगञ्ज–दाङ रुटमा यात्रु लिएर जाँदा आँउदा सबै यात्रुवहाक सवारीहरुले एक सयका दरले रकम बुझाउँदै आएको बताएका छन् ।

यात्रुबहाक सवारी बाहेक अटो रिक्सा, लाइसेन्स वा ब्लु बुक नबोकेका मोटरसाइकल धनी, ओभरलोड ट्याक्टर, टिप्पर लगाएतका सवारीहरुबाट ट्राफिक पोष्टहरुमा खटिएका ट्राफिक प्रहरीले मिलेसम्म बार्गेनिङ्ग गर्दै रकम असुलिरहेको श्रोत बताउँछ । श्रोतका अनुसार एकै रुटमा चल्ने अधिकांश सवारीहरुले पूर्व निर्धारित मौखिक सहमतिअनुसार पोष्टमै पुगेर अझै पनि रकम बुझाउने प्रक्रिया ट्राफिकले जारी राखेको छ ।