कोहलपुर / वरिपरी सुराकी राखेर जुवा खेलिरेहका जुवाडेका सुराकीलाई चक्मा दिँदै प्रहरीले ७ जुवाडे सहित करिब ३ लाख ५० हजार रुपैयाँ नियन्त्रणमा लिन सफल भएको छ । कोहलपुर–८ झकट्टीमा ठुलो रकम सहित हार जीतको जुवा भइरहेको सूचना प्रहरीले पाएपछि जुवाडेलाई नियन्त्रणमा लिन प्रहरीले एम्बुलेन्स नै प्रयोग गर्नुपरेको थियो ।

जुवा खेल भइरहेको ठाउँ भन्दा वरपर ठाउँ ठाउँमा जुवाडेहरुले सुराकी राखेकाले प्रहरी सो क्षेत्रमा प्रवेश गर्नेवित्तिकै जुवाडे भाग्न सक्ने भएकाले विरामी लिने भन्दै प्रहरी जुवाको खेल भइरहेको घरसम्म एम्बुलेन्समै पुगेर जुवाडेहरुलाई नियन्त्रणमा लिन सफल भएको इलाका प्रहरी कार्यालय कोहलपुरका प्रहरी नायब उपरीक्षक रबिन्द्र खनालले जानकारी दिएका छन् । प्रहरीले बैजनाथ ८ का रंजित वि.सी., कोहलपुर ११ का अमृत गिरी, कोहलपुर ११ कै रमेश थापा, बैजनाथ ६ का धर्म राज रावत, कोहलपुर ५ का विशाल के.सी. र कोहलपुर ५ कै युवराज बुढाक्षेत्रीलाई जुवा खेलिरहेको अवस्थामा पक्राउ गरेको छ । उनीहरुलाई जुवा ऐन अन्र्तगत मुद्दा दर्ता गरी कारवाही अगाडी बढाइने प्रहरीले जानकारी दिएको छ ।

कोहलपुर प्रहरीले चाड पर्वमा हार जीत सहितका जुवा नियन्त्रणका लागि सक्रियता बढाइसँगै जुवा खेल्ने र खेलाउने काममा कमी आएपनि जुवाडेहरु स्थान परिवर्तन गरी जुवाजन्य गतिविधीहरुलाई निरन्तरता दिइराखेका छन् । केही दिन अघि मात्रै इलाका प्रहरी कार्यालयको प्रहरी टोलीले विहान २ बजेको समयमा बैजानाथ–४ चिल्लेटामा रहेको एक नर्सरीमा जुवाँ तास खेल भइरहेको सूचना पाएपछि प्रहरीले ४० हजार नगद सहित ३ जुवाडेलाई नियन्त्रणमा लिएको थियो ।