चितवन २२ असाेज

चितवनको भरतपुर अस्पतालमा कार्यरत स्वास्थ्यकर्मी एवं अस्पताल विकास समिति कर्मचारी युनियनका अध्यक्ष सञ्जय बरालले आफ्नो छोरा समर बरालको जन्मोत्सवको अवसर पारेर शैक्षिक सामग्री वितरण गरेका छन्

। समरको १५औँ जन्मोत्सवको अवसर पारेर भरतपुर–२२ का विपन्न समुदायका पाँच जना विद्यार्थीलाई शैक्षिक सामग्री वितरण गरिएको हो । बरालले चेपाङ र बोटे समुदायका पाँच जना विद्यार्थीलाई विद्यालय पोसाक, विद्यालय झोला, कपी र कलम वितरण गरेका हुन् । भरतपुर–७ घर भएका बराल चितवनको पर्सामा रहेको सैनिक आवासीय माध्यमिक विद्यालयमा कक्षा १० मा अध्ययन गर्छन् ।

किशोरावस्थादेखि नै सामाजिक काममा छोरालाई सहभागी गराउँदै सामाजप्रति जिम्मेवार बनाउन उनको जन्मदिन विपन्न समुदायका विद्यार्थीसँग मनाएको सञ्जय बरालले बताए । जन्मदिनमा फजुल खर्च गर्ने प्रवृत्ति बढ्दै गएको सन्दर्भमा छोरालाई फजुल खर्च गर्नुभन्दा विपन्न परिवारलाई सहयोग गर्नु मानवीय काम भएको भन्दै उनलाई जिम्मेवार नागरिक बनाउन आफूले छोरालाई सँगै लगेर विपन्न वर्गका विद्यार्थीसँग जन्मदिन मनाएको बरालको भनाइ छ ।

शैक्षिक सामग्री प्रदान गरिएका पाँचै जना बालबालिकाहरु भरतपुर–२२ को आधारभूत विद्यालय धनौजीमा अध्ययनरत छन् ।