प्रदेश २ का मुख्यमन्त्री लालबाबु राउतले आज विश्वासको मत लिने भएका छन् । 

सरकारको नेतृत्वकर्ता दल जनता समाजवादी पार्टी (जसपा) विभाजन भएपछि मुख्यमन्त्री राउतले विश्वासको मत लिन लागेका हुन् । सरकारको नेतृत्वकर्ता दल विभाजन भएपछि विश्वासको मत लिनुपर्ने संवैधानिक बाध्यता छ । 

मुख्यमन्त्रीले विश्वासको मत लिनका लागि सरकारले आजका लागि प्रदेश सभाको अधिवेशन आह्वान गरेको थियो । प्रदेश २ का अर्थमन्त्री शैलेन्द्र साहले बुधवार विश्वासको मत लिने तयारी रहेको लोकान्तरलाई जानकारी दिए । 

जसपाबाट महन्थ ठाकुर अलग भएर छुट्टै पार्टी गठन गरेपछि प्रदेश २ मा जसपाका १६ सांसदले नयाँ दल रोजेका थिए । २०७४ सालमा तत्कालीन संघीय समाजवादी पार्टी र राष्ट्रिय जनता पार्टी मिलेर गठबन्धन सरकार बनाएका थिए । प्रदेश २ मा जसपासँग ३७ सांसद छन् । 

जसपा विभाजन भए पनि सत्ता गठबन्धनसँग स्पष्ट बहुमत रहेकोले विश्वासको मत पाउनेमा मुख्यमन्त्री ढुक्क छन् । मुख्यमन्त्री राउतको सरकारमा नेपाली कांग्रेस र नेकपा माओवादी सहभागी छ । 

नेकपा एस समेत सरकारमा सहभागी हुने चर्चा छ । दल विभाजन भए पनि प्रदेश १ र बागमती प्रदेशका मुख्यमन्त्रीले भने विश्वासको मत लिने प्रक्रिया शुरू गरेका छैैनन् ।