काठमाडौं

१३ असोज, काठमाडौं । सरकारमा पठाउने नयाँ मन्त्री छनोट गर्नको लागि सत्ता साझेदार नेकपा (माओवादी केन्द्र) को स्थायी कमिटीको बैठक बस्ने भएको छ । 

आज (बुधबार) दिउँसो मध्याह्न १२ वजे पार्टी केन्द्रीय कार्यालय पेरिसडाँडामा बस्ने जानकारी दिइएको छ । यस अघिको एक स्थायी कमिटी बैठले नयाँ मन्त्री छानोटको लागि अध्यक्ष पुष्पकमल दाहाल प्रचण्डलाई जिम्मा दिएको थियो । 

पाँच दलीय सत्त गठबन्धनभित्रको सहमतिअनुसार माओवादी केन्द्रले पाँच मन्त्री र एक राज्यमन्त्री पाउनेछ । माओवादी केन्द्रबाट अर्थमा जनार्दन शर्मा र ऊर्जामा पम्फा भुसालमन्त्री भइसेका छन् । आजको बैठकमा  मन्त्रीको नामावली तथा अगामी महाधिवेशनलगायतका विषयमा छलफल हुने स्थायी कमिटी सदस्य गणेश साहले जानकारी दिनु भयाे ।  

माओवादीमा नयाँ मन्त्री बन्नेहरुमा ८ जना सांसदहरूको नाम चर्चामा छ । जसमा नारायणकाजी श्रेष्ठ, हरिबोल गजुरेल, देवेन्द्र पौडेल, सुदन किराती, महेश्वर गहतराज, हरि चौधरी र अमनलाल मोदी र सुरेश राई हिमाल हुनुहुन्छ । यी ८ मध्ये ४ जनाले मात्र मन्त्री हुन पाउनु हुनेछ । 

हिजो (मंगलबार) दिउँसो ३ बजे बस्ने भनिएको माओवादी केन्द्रको स्थायी कमिटी बैठक स्थगित भएको थियो । सरकार गठन भएको साढे दुई महिनापछि प्रधानमन्त्री शेरबहादुर देउवाले मन्त्रिमण्डल विस्तार गर्ने गृहकार्य अगाडि बढाउनु भएको छ । 

सत्ता गठबन्धनका दलहरूको आग्रहमा सोमबार राजनीतिक दलसम्बन्धी अध्यादेश खारेज भएसँगै प्रधानमन्त्री देउवाले मन्त्रिमण्डललाई पूर्णता दिन लाग्नु भएको हो ।