कोहलपुरमा अमेरिकि मिलिनियम च्याललेन्ज (एमसिमी) परियोजनाको विरोध गर्दै र्याली निकालिएको छ । राष्ट्रिय प्रजातन्त्र पार्टी निकटका महिला संघ र युवा संगठन कोहलपुर नगर समितिको संयोजनमा एमसिसी परियोजना राष्ट्रघाती परियोजना भएको भन्दै विरोध स्वरुप र्याली निकालिएको हो । कोहलपुर साँझा चोकबाट शुरु भएको विरोध र्याली कोहलपुर चौराहामा पुगेर कोणसभामा परिणत भएको थियो ।

विरोध र्यालीका सहभागिहरुले नो एमसिसी, राष्ट्रघाती एमसिसी परियोजना खारेज गर, वैदेशिक हस्तक्षेप बन्द गर, हिन्दु राष्ट्र कायम गर लगाएतका नारा सहित प्ले कार्ड बोकेर विरोध जनाएका जनाएका थिए । विरोध र्याली पछिको कोण सभालाई सम्बोधन गर्ने वक्ताहरुले एमसिसी परियोजना सम्झौता भएको खण्डमा अमेरिकी सरकारले नेपालको प्राकृतिक श्रोतसाधन दोहन गरेर अरबौ रकम आफ्नो मुलुकमा भित्र्याउने भन्दै सबै सचेत नागरिकले एमसिसीपरियोजनाको विरोध गर्नुपर्नेमा जोड दिएका थिए । संसदको दुई तिहाई बहुमतबाट अमेरिकाले अघि सारेका सर्त सहित पारित भएमा यो परियोजनाबाट नेपाली जनताले कुनै पनि समुन्नती नपाउने विरोध र्यालीका वक्ताहरुले बताएका छन् । सयौंको संख्यामा उपस्थित कोणसभामा अधिकांश वक्ताले गणतन्त्र, संघीयता र धर्मनिरपेक्षताको आवरणमा देशमा अनियमितता, भ्रष्टाचार, धर्मान्तरण, हत्या, आतंक र बलात्कार जस्ता जघन्य अपराध मौलाएको आरोप लगाउदै देशमा राजतन्त्र पुनस्र्थापना गर्नु अनिवार्य भैसकेको बताएका छन् । कार्यक्रममा राप्रपा केन्द्रिय सम्पादन सदस्य हिक्मत ढकाल, राप्रपा नेता तथा पूर्व मन्त्री प्रेम बहादुर भण्डारी, राप्रपा बाँके अध्यक्ष नरेन्द्र पौडेल, जिल्ला सदस्य श्रीधर सुवेदी, राप्रपा कोहलपुर नगर अध्यक्ष अर्जुनजंग शाह लगाएत राप्रपा नेता कार्यकर्ता तथा विभिन्न भातृ संघ संगठनका पदाधिकारीहरुको सहभागिता रहेको थियो ।

यस्तै संविधान दिवसको दिन धनगढीमा राजावादीहरुको विरोध प्रदर्शन भएको छ । २०४७ सालको संविधान पुनर्बहाली, राष्ट्रघाती एमसिसि सम्झौता तथा सङ्घीयताको खारेजी र राजा सहितको हिन्दुराष्ट्र पुनःस्थापनाको मागसहित धनगढीको ट्राफिक चोकबाट निकालिएको विरोध ¥याली पार्कमोड पुगेर कोणसभामा परिणत भएको थियो । कोणसभामा बोल्ने वक्ताहरूले काँग्रेस, कम्युनिस्टको भ्रष्टाचारी र देशद्रोही आचरणले देश संकटमा परेको टिप्पणी गरेका थिए । राष्ट्रिय प्रजातन्त्र पार्टी कैलालीको आयोजनामा भएको विरोध कार्यक्रममा मानसिह साउद, दीपक मल्ल, कमल बम, रामदुलारी राना, गोविन्द बिष्ट, केन्द्रीय सदस्य हेमबाबु लेखक टेकराज पनेरुले सम्बोधन गरेको कुरा विरोध कार्यक्रमका संयोजक तथा राप्रपा केन्द्रीय सदस्य ललित जोशीले जानकारी दिए ।