काठमाडौं / नेकपा माओवादी केन्द्रका स्थायी समिति सदस्य जनार्दन शर्माले पार्टीका हरेक तहका कमिटीहरुमा कार्यकर्ताले नेता छान्न पाउने विधि लागू गर्नुपर्ने बताउनुभएको छ ।

अनेरास्ववियू क्रान्तिकारीको २४ औं क्याम्पस जिल्ला सम्मेलनलाई राजधानीमा सम्बोधन गर्दै नेता शर्माले माथिबाट नेता तोकिदिने परिपाटी अन्त्य गर्दै जानुपर्नेमा जोड दिनुभएको हो ।

माओवादी केन्द्रका संगठन विभाग प्रमुख समेत रहनुभएका नेता शर्माले संगठनका हरेक तहमा युवाहरुले आफ्नो नेतृत्व आफै छान्ने विधिलाई स्थापित गर्नुपर्ने बताउनुभयो । ‘युवाहरु अघि बढ्नुस्, आफ्नो नेता तपाई आफै चुन्नोस्’ उहाँले भन्नुभयो ‘माथिबाट तोकिदिएको नेताले भन्दा चुनिएर आएको नेताले संगठन बनाउँछ, पार्टी बनाउछ ।’ उहाँले पार्टीको नीतिबमोजिम विद्यार्थी संगठनमा समेत ३५ प्रतिशत संख्यामा महिला नेतृत्व चुन्न आग्रह गर्नुभयो ।

सरकारका अर्थमन्त्री समेत रहनुभएका नेता शर्माले प्रतिस्थापन विधेयकमार्फत सरकारले देशका हरेक वडाहरुमा ‘लेडिज फष्ट’ (अर्थात महिला पहिला) कार्यक्रम ल्याएको उल्लेख गर्नुहुँदै यसको मर्मबमोजिम हरेक निकायमा महिलालाई नेतृत्वदायी तहमा जिम्मेवारी दिन आग्रह गर्नुभयो ।

यस्तै सरकारले ‘पढ्दै कमाउदै’ कार्यक्रम ल्याएको जानकारी दिँदै मन्त्री शर्माले अब हरेक विद्यार्थी स्वरोजगार हुँदै जानुपर्ने र हरेक विद्यार्थी कुनै न कुनै उत्पादनमूलक काममा समेत जोडिनुपर्ने बताउनुभयो । ‘पढ्दै, कमाउदै’ कार्यक्रम हालको लागि नमूनाको रुपमा कक्षा १२ अध्ययनरत विद्यार्थीहरुको बिचमा संचालन गरिने भएतापनि विद्यार्थी संगठनहरुले यसको महत्व स्थापित गरेर देशव्यापी बनाउन सहयोग गर्नुपर्ने मन्त्री शर्माको भनाइ छ ।

विद्यार्थी संगठनको नेता नियमित रुपमा अध्ययनरत विद्यार्थी नै हुनुपर्ने भन्दै नेता शर्माले शैक्षिक संस्थाबाट पासआउट भइसकेको व्यक्तिले पुस्तान्तरण गरी आफ्नो उत्तराधिकारी जन्माउदै जानुपर्ने बताउनुभयो ।