कोहलपुर/यातायात व्यवस्था विभागले आप्mनो मातहतका कार्यालयबाट सवारी अनुमति पत्र (लाइसेन्स) सवारी चालकहरुलाई सहज रुपमा वितरण गर्न सकिरहेको छैन । यातायात व्यवस्था कार्यालय बाँकेले कोभिड १९ पछिको महामारीका कारण लकडाउन अघि दर्ता भई ट्रायल मिति तोकिएका तर ट्रायल नभएका परीक्षार्थीको ट्रायल आइतबारबाट सुचारु गरेको छ । आइतवारबाट शुरु भएको ट्रायलमा लकडाउनका कारण ट्रायल रोकिएका परीक्षार्थीहरुले सहभागिता जनाएका छन् । अर्को चरणमा ४ गतेबाट पुनः लकडाउनको समयमा लिखित परीक्षा दिएका परीक्षार्थीहरुको ट्रायल पूर्ववतः अवस्था अनुसार सुचारु हुने बताइएको छ ।

मंगलबार ट्रायल परीक्षा स्थल कोहलपुरको १३ विगाह मैदानमा फरक दृश्य देखियो । एक जना व्यक्तिको मोवाइल सेट यातायातका कर्मचारीले नियन्त्रण लिन्छन् । कारण बुझ्दा उनको मोवाइलमा लाइट बलिरहेको र उनले ट्रायल परीक्षार्थीको भिडियो मोवाइलको क्यामरामा कैद गरिरहेको अनुमान गरेर यातायातका कर्मचारीले मोवाइल नियन्त्रणमा लिएका हुन्छन् । मोवाइल धनी इलाका प्रहरी कार्यालय कोहलपुरमा कार्यरत प्रहरी हवल्दार रहेको र उनको मोवाइलमा भिडियो कैद नभएको पाइएपछि नियन्त्रणमा लिइएको मोवाइल फिर्ता गरिदिन्छन, नियन्त्रणमा लिएका यातायातका कर्मचारीले ।

यस विषयमा प्रतिक्रिया लिन इलाका प्रहरी कार्यालय कोहलपुरका प्रहरी नायब उपरीक्षक रबिन्द्र खनालसँग सम्पर्क गर्दा यस विषयमा आफू अनभिज्ञ रहेको बताए । उनले भने–“तपाइले नै यस विषयमा जानकारी गराउनु भयो । मेरो मातहतका कर्मचारीबाट यस विषयमा जानकारी अहिलेसम्म भएको छैन । यस विषयमा गम्भिर रुपमा मेरो मातहतका अधिकृतहरुसँग तत्काल जानकारी लिनेछु ।” तर प्रहरीको किन मोवाइल नियन्त्रणमा लिइयो ? यो विषयमा चाँसाे र जिज्ञासा राखेकाे, उनले भने । समाजमा शान्ति सुरक्षा प्रत्याभुती गर्ने नियामक निकाय प्रहरी भएकाले ट्रायल परीक्षा स्थलमा परीक्षार्थीहरुबाट अनुचित गतिविधीका साथै हुल हुल्लजत हुन सक्ने सम्भावन बढि हुने गरेकाले प्रहरी स्वभाविक रुपमा त्यस्तो ठाउँमा पुगेको हुन सक्ने डिएसपी खनालले बताए । प्रहरीको मोवाइल यातायातका कर्मचारीले नियन्त्रणमा लिएको घटनाको पछि के रहस्य रहेछ यस विषयमा आफू चाँसाे भएको उनको भनाई छ ।

तर यातायात व्यवस्था कार्यालय भेरीका प्रमुख पूर्ण बहादुर खत्रीले भने प्रहरीले आफ्नो क्षेत्राधिकार भित्र परीक्षा स्थलमा कुनैपनि दृश्य सामाग्री लिन पाउने नभएको बताएका छन् । यदि परीक्षा स्थलमा हुल हुज्जत तथा शान्ति सुरक्षा आवश्यक परेमा प्रमुख जिल्ला अधिकारीसँग समन्वय गरेर सुरक्षा व्यवस्थापन गर्न सकिने विकल्प रहेको बताए । समानान्तर सरकारी निकायले हस्तक्षेप गर्न नपाउने सैद्वान्तिक प्रावधान रहेकोे तर माथिल्लो नियामक निकाय जस्तो अख्तियारले सम्म निगरानी गर्न सक्ने उनले बताएका छन् । यस घटना असमझदारीका कारण हुन गएको तर पछि परीक्षा स्थलमा रहेका ट्राफिक प्रहरी निरीक्षकले समन्वयकारी भूमिका निर्वाह गरेकाले विवाद तत्काल समाधान भएको जानकारी दिएका छन् । सवारी चालक अनुमति पत्र वितरणमा आफू अत्यन्तै संवेदनशील भएकाले आफ्नो कार्यकालमा कुनै पनि अवाञ्छित गतिविधीहरु हुन नसक्ने उनले प्रतिक्रिया दिएका छन् ।

बाँकेमा रहेको यातायात व्यवस्था कार्यालय सवारी चालक अनुमति पत्र वितरणमा विवादित बन्दै आइरहेको कार्यालय हो । एक दशक अघि नेपालगञ्जको एक होटलबाट यातायातका कर्मचारी र विचौलियाबीच अवैधानिक परीक्षाहरुलाई वैधानिक बनाईरहेको अवस्थामा प्रहरीले छापा हानेर यातयात कर्मचारीहरुसँगै विचौलियाहरुलाई नियन्त्रणमा लिएको थियो ।