काठमाडौं, भदौ २३

नेकपा एमालेले संघीय संसदको बैठक सञ्चालन हुन नदिने भएको छ। आज ४ बजेटबाट संघीय संसदको प्रतिनिधि सभा र राष्ट्रिय सभाको अधिवेशन प्रारम्भ हुदैँछ।

नेकपा एमाले संसदीय दलका नेता केपी शर्मा ओलीले गैरसांसदको उपस्थितिमा संसद बैठक सञ्चालन गर्न नदिने बताएका हुन्

एमालले गत भदौ १ गते माधव नेपालसहित १४ सांसदलाई कारबाहीको सूचना सभामुखलाई दिएको थियो। उक्त सूचना अनुसार सांसदलाई कारबाहीको सूचना सभामुख अग्नि सापकोटाले प्रकाशित गरेका थिएनन्। त्यसबीच दल विभाजनसम्बन्धी अध्यादेश अनुसार माधव नेपाल सहितका सांसद सहभागि भएर नयाँ दल गठनभएपछि सभामुख सापकोटाले सूचना प्रकाशन नगर्ने निर्णय गरेका थिए।  एमालेले साउन २५ गतेको पार्टी निर्णयबाट उनीहरु कारवाहीमा परेको उल्लेख गरेको छ। 

एमालेको दलका नेता ओलीले आफूहरूले कारबाही गरेका ती सांसद आजको बैठकमा प्रवेश गरे ती गैरसांसद हुने उल्लेख गर्दै उनीहरूको उपस्थितिमा संसद बैठक सञ्चालन हुन नसक्ने बताएका हुन्। 

‘प्रतिनिधिसभा र राष्ट्रियसभा नियमावलीले गैरसांसदको उपस्थितमा बैठक सञ्चालन हुन नसक्ने व्यवस्था गरेको छ’, ओलीले बानेश्वरमा बसेको एमाले संसदीय दलको बैठकमा भने, ‘साउन २५ गते निष्कासन गरेको व्यक्ति भदौ २३ को बैठकमा उपस्थित हुन्छन् भने उनीहरू गैरसांसद हुन्। गैरसांसद उपस्थित भएपछि कसरी सभा चल्न सक्छ।’

उनले सभामुखले आफ्नो पार्टीले कारबाही गरेका सांसदको लोगो खोस्नुपर्ने बताए।  

‘लोगो किन खोस्दैनन् सभामुखले’, ओलीले भने, ‘ गैरसांसद ढोकाबाट नफर्काइन्जेलसम्म संसद चल्न सक्दैन।’

उनले सभामुख सापकोटा एमाले फुटाउने षड्यन्त्रमा सामेल भएकाले त्यस्तो सभामा उनलाई सभामुख मान्न नसकिने समेत बताए। 

‘हाम्रा अगाडि जनताका बोल्नपर्ने थुप्रो समस्या छन्। तर यो अपराधिक गठबन्धनले एमाले फुटाउने कार्य पूरा गरेकाले आजबाट संसद अधिवेशन सुरू गरेको हो’, ओलीले भने, ‘जनताका लागि बोल्न दिन सुरू गरेको हो र! होइन। त्यसकारण यो अधिवेशन एउटा अपराधिक योजना सफल पारेको हुनाले अब खुला भएको हो।’

उनले आफ्नो पार्टीले गरेको कारबाहीलाई सभामुखले मान्यता नदिएको तर माओवादीले कारबाही गरेका लेखराज भट्ट, गौरीशंकर चौधरीहरूको कारबाही मान्यता दिएकोमा प्रश्न गरे।

‘पहिला निकालिएकाहरू हाजिर गर्नुपर्‍यो। लेखराज भट्ट, गौरीशंकार चौधरी, प्रभु शाह पहिला हाजिर गर्नुपर्‍यो। एउटा बैठक उहाँहरू राखेर चलाऊँ’, ओलीले भने, ‘त्यसपछि अर्को बैठक चलाउँला।’

उनले एकथरी पार्टीको अधिकारका रूपमा सांसद कारबाही गरिदिने तर अर्कोथरी पार्टीको हकमा फुटाउन सहयोग गर्ने व्यक्तिलाई सम्माननीय सभामुख भन्न नसकिने टिप्पणी गरे।

‘गैरसांसदको उपस्थितिमा बैठक गर्न नियमावलीले नै दिँदैन। आज राष्ट्रपति कार्यालयबाट आएको पत्र सुनाउने बित्तिकै…’, ओलीले भने, ‘सुनाए पनि हुन्छ नसुनाए पनि हुन्छ। त्यो पत्र किन चाहिएको छ र! हामीलाई थाहा छ राष्ट्रपति कहाँबाट पत्र आएको छ। त्यसैले डाकेको होला। बैठक चल्न सक्दैन।’

ओलीले सभामुख सापकोटाले किर्ते काम गरेको बताए। 

‘पार्टी विशेषको कार्यकर्ताको रूपमा गठबन्धनको कार्यकर्ता र प्रमुख प्रतिपक्षीको विरोधी र एमाले विरोधीको रूपमा एमाले पार्टी फुटाउन अमर्यादित गैरकानुनी काम गर्ने मान्छे सभामुख हुनुहुन्छ’, ओलीले भने, ‘त्यस्तो मान्छेलाई खुरुखुरु सभामुख मानेर उपस्थित कसरी हुने!’

उनले सभामुखको भूमिका एमाले विरोधी र एमाले फोड्ने रहेको टिप्पणी गरे।