भदौ २२

नेकपा एमालेका अध्यक्ष केपी शर्मा ओलीले पाकिस्तानमा सत्ता कब्जा गरेका विद्रोही समूह तालिवानसँग वार्ता गर्न सुझाव दिएका छन्।

अफगानिस्तानमा अलपत्र परेका नेपाली नागरिकको उद्धार गर्न तालिवानसँग टेलिफोनमा भए पनि कुरा गर्न उनले सुझाए। 

‘तालिवानसँग टेलिफोनमा कुरा गर्नु पर्दैन, हाम्रा नागरिक ल्याउँछौं, हाम्रो प्लेन पठाउँछौं भन्नु पर्दैन,’ पूर्वप्रधानमन्त्री समेत रहेका ओलीले भने,‘सक्दैन, मानिलिऊँ घरैमा तालिवान आएर गालैगालामा हान्छ कि क्या हो!’

अहिलेको सरकार जोसँग पनि डराउने गरेको भन्दै उनले आफू कुनै आवेश र उत्तेजनामा नरहेको समेत ओलीले बताए।

अध्यक्ष ओलीले अफगानिस्तानमा अलपत्र नागरिकप्रति सरकार गैरजिम्मेवार बनेको आरोप लगाए।

‘अफगानिस्तानमा नेपालीको जीवन असुरक्षित छ, हामीले समस्या आयो भन्ने बित्तिकै २४ घण्टाभित्र आफ्नै जहाज पठाएर उद्धार गरेका थियौं,’ ओलीले भने, ‘अहिले महिनौं बित्दा पनि यो सरकार कानमा तेल हालेर बसेको छ।’

एमाले कास्कीको अगुवा कार्यकर्ता भेलामा बोल्दै ओलीले अहिलेको सरकार घरको बाघ र वनको स्याल भएको टिप्पणी गरे।

‘सरकार जनताविरूद्ध बडो शेर पल्टन्छ, विदेशीको अगाडि टाङमुनि पुच्छर हालेर कुँइकुँइ गर्छ, चुइक्क बोल्दैन,’ ओलीले भने, ‘अहिलेको सरकार भनेको घरको बाघ हो, वनको स्याल।’

सरकारले जनतासँग आक्रामक बाघको जस्तो व्यवहार गर्ने गरेको भन्दै उनले अलोकतान्त्रिक ढंगबाट बनेको गैरजिम्मेवार सरकार भएको आरोप लगाए।

भारतले नेपाली भूमिमा हेलिकप्टर उडाउँदा समेत सोध्न नसकेको उनले बताए।

‘हामीले त हाम्रो भूमि फिर्ता लेऊ भन्यौं, बोल्यौं,’ उनले भने, ‘उहाँहरू किन बोल्न सक्नुहुन्न ? उहाँहरूमा त्यो दम छैन।’