१८ भदौ, काठमाडौं

एटविनद्वारा मानव अधिकार आयोगको ध्यानाकर्षण मानव बेचबिखन र ओसारपसार विरुद्धको १५ औं राष्ट्रिय दिवसको सन्दर्भमा आज महिला तथा बालबालिका बेचबिखन बिरुद्धको सहकर्मी समूह (AATWIN) ले राष्ट्रिय मानव अधिकार आयोगको ध्यानाकर्षण गराएको छ। हरेक बर्ष भाद्र २० गते मनाइने यस दिवसको अवसरमा एटविनमा आबद्ध ४१ संस्थाहरुको तर्फबाट ध्यानाकर्षण गराइएको हो।

एटविनका अध्यक्ष नातिसरा राईले नेपाल बाहिर मात्र नभएर नेपालभित्रै बर्षेनी हजारौ नेपाली महिला तथा किशोरीहरु आन्तरिक बेचबिखनमा पर्ने गरेको हुनाले उनीहरुको मानव अधिकारको रक्षाको लागि ध्यानाकर्षण गराइन्। यसैगरी आफन्त नेपालको तर्फबाट एटविन कार्यसमितिका पूर्व सदस्य इन्द्रराज भट्टराईले वैदेशिक रोजगारीका क्रममा हजारौं नेपाली महिलाहरु भारत लगायत अन्य मुलुकमा बेचबिखनमा पर्ने गरेको हुनाले नेपाल सरकारको ध्यानाकर्षण गराउन अपिल गरेका छन्।

भट्टराईले मानव बेचबिखन बिरुद्धको ऐन संसोधन तथा पालेर्मो प्रोटोकलको कार्यान्वयन, मानव बेचबिखनमा परेका पीडित तथा प्रभावितहरुको उद्धार, स्वदेश फिर्ती लगायतका विषयहरुमा सरकारको ध्यानाकर्षण गराएका थिए। एटविनका महासचिव बालकुमारी दर्लामी तथा एटविनका कार्यकारी निर्देशक वेनुमाया गुरुङले बेचबिखन न्युनिकरणका लागि संस्थाले अगाडि बढाएका अभियान बारेमा जानकारी गराएका‌ थिए। राष्ट्रिय मानव अधिकार आयोगका सदस्य लिली थापाले आयोगले आफ्नो रणनीतिक योजनामा यो मुद्दालाई प्राथमिकतामा राखिएको जानकारी गराइन्।

आयोगका अध्यक्ष तम बहादुर मगरले मानव बेचबिखन नियन्त्रणका लागि नेपाल सरकारको हालसम्मको पहल सराहनीय रहेको भन्दै हाल बेचबिखनको जोखिम बढेको हुँदा आगामी दिनमा जोखिम न्यूनीकरण गर्न सरकारको ध्यानाकर्षण गराउने प्रतिबद्धता व्यक्त गरेका थिए। ध्यानाकर्षण कार्यक्रममा मानव अधिकार आयोगका सदस्य मिहित ठाकुर, एटविनका सदस्य शक्ति मिलन समाज, वाल समाज नेपाल, शक्ति समूह, आफन्त नेपाल, ओरेक, कुमुदिनी, शुभ अवसर ग्राम नेपाल लगायतका संस्थाहरुका प्रतिनिधिहरुको उपस्थिति रहेको थियो।