काठमाडौं, भदौ १७, 

नेपालले भारतविरुद्धको पहिलो मैत्रीपूर्ण खेलका लागि चार खेलाडी परिवर्तन गरेको छ । मुख्य प्रशिक्षक अब्दुल्लाह अल्मुताइरीले रोहित चन्द, विशाल राई, सुनील बल र एरिक विष्टलाई टोलीबाट हटाएका छन् ।

अष्ट्रेलियाविरुद्ध रातो कार्डको सामना गरेका रोहित चन्द अहिले इन्डोनेसियामा छन् । उनीहरूको स्थानमा आयुष घलान, दिनेश राजवंशी, तेज तामाङ र अञ्जन विष्टले पहिलो रोजाइमा स्थान बनाएका छन् ।

दशरथ रंगशालामा हुने आजको खेललाई दुवै टोलीले एक महिनापछि माल्दिभ्समा हुने साफ च्याम्पियनसिपको तयारीका रूपमा लिएका छन् ।

नेपालले भारतविरुद्ध खेल्न लागेको सन् २०१७ जुन ६ पछि यो पहिलोपटक हो । पछिल्लोपटक पनि नेपालले भारतविरुद्ध मैत्रीपूर्ण खेल खेलेको थियो । उक्त खेलमा नेपाल २–० ले पराजित भएको थियो ।

नेपालमा आएर भारतले खेल्न लागेको भने २०१५ मार्च १७ पछि यो पहिलोपटक हो । त्यति बेला भारत फिफा विश्वकप छनोट खेलका लागि नेपाल आएको थियो । दशरथ रंगशालामै भएको उक्त खेलमा नेपालले भारतलाई गोलरहित बराबरीमा रोकेको थियो ।

दशरथ रंगशालामा नेपाली टोलीका प्रशिक्षक अब्दुल्लाह अल्मुताइरीको पनि पहिलो खेल हो । यसअघि, नेपालले अल्मुताइरीको प्रशिक्षणमा चार खेल खेलिसकेको छ । चारमध्ये चाइनिज ताइपेईलाई हराएको नेपालले बाँकी तीन खेल हारेको थियो ।

पछिल्लोपटक नेपालले खेलेको अन्तर्राष्ट्रिय खेलमा अष्ट्रेलियालाई ३–० को नतिजा सुम्पिएको थियो । नेपालले विश्वकप तथा एएफसी एसियन कप छनोट खेलमा अष्ट्रेलियाविरुद्ध खेलेको हो ।

भारतविरुद्ध यसअघिका मैत्रीपूर्ण खेल 
१२ नोभेम्बर २०१३ :   भारत २–० नेपाल
३१ अगष्ट २०१५ :      भारत ०–० नेपाल
७  जुन २०१७ :        भारत २–० नेपाल

नेपाली टोली
गोलकिपर : किरण चेम्जोङ (कप्तान)
रक्षक : अनन्त तामाङ, दिनेश राजवंशी, सुमन अर्याल, गौतम श्रेष्ठ 
मिडफिल्डर : पुजन उपरकोटी, तेज तामाङ, सुमन लामा 
फरवार्ड : नवयुग श्रेष्ठ, आयुष घलान, अञ्जन विष्ट