काठमाडौं, भदौ १३

नेकपा एमालेका उपाध्यक्ष भीम रावलले भारतीय जनता पार्टीका विदेश विभाग प्रमुख विजय चौथाइवालेले प्रधानमन्त्री शेरबहादुर देउवालगायत विभिन्न दलका शीर्ष नेताहरूलाई भेटेकोबारे प्रश्न उठाएका छन्।

आइतबार ट्विट गर्दै रावलले नेपाली नेताहरूले कूटनीतिक मर्यादाको सीमा नाघेर भाजपाका नेता चौथाइवालेसँग भेटेको बताए।

भेटवार्ता गर्ने कुन-कुन नेताहरूले महाकालीमा तुइन खुस्काएर जयसिंह धामीको हत्या गर्ने भारतीय सुरक्षाकर्मीलाई कारबाहीको विषय उठाए भन्दै प्रश्न गरेका छन्।

‘कूटनीतिक मर्यादाको सीमा नाघेर भाजपाका नेता चौथाइवालेसँग भेटवार्ता गर्ने कुन कुन नेपाली नेताले महाकालीमा तुइन खुस्काएर जयसिंह धामीको हत्या गर्ने भारतीय सुरक्षाकर्मीलाई कारबाही गर्ने विषय उठाएछन्, ‘उनले लेखेका छन्।

साथै उनीहरूबीच के-कस्तो कुराकानी भएको भन्नेबारे जनतालाई जानकारी गराउनसमेत रावलले  माग गरेका छन्।

‘राष्ट्रिय हितका के कुरा गरेछन्, जनतालाई जानकारी गराउने नैतिक जिम्मेवारीबोध गर्ने कि?,’ उनले लेखेका छन्।

भारतको सत्तारूढ दल भाजकाका विदेश विभाग प्रमुख चौथाइवाले गत साता काठमाडौं आएका थिए। काठमाडौंमा उनले प्रधानमन्त्री शेरबहादुर देउवा, नेकपा एमालेका अध्यक्ष केपी शर्मा ओली, माओवादी केन्द्रका अध्यक्ष पुष्पकमल दाहाल ‘प्रचण्ड’,  लोकतान्त्रिक समाजवादी पार्टीका अध्यक्ष महन्थ ठाकुर नेतासँग भेटवार्ता गरेका थिए।