भदौ ११ गते 

नेकपा (माओवादी केन्द्र)को स्थायी कमिटीले पार्टीको गण्डकी प्रदेश कमिटीको इञ्चार्ज, सहइञ्चार्ज र अध्यक्ष तोकेको छ ।

स्थायी कमिटीले मंगलबार गण्डकी प्रदेश कमिटीको इञ्चार्जको जिम्मेवारी हितराज पाण्डेलाई दिएको छ । सहइञ्चार्जमा यशोदा गुरुङलाई तोकेको छ ।

त्यस्तै पार्टीको गण्डकी प्रदेश कमिटीको अध्यक्षमा हरि अधिकारीलाई तोकेको छ । साथै गण्डकी प्रदेश सम्पर्क समितिको इञ्चार्जमा चुडामणि खड्का तोकिएका छन् ।

गण्डकी प्रदेशका ११ वटा जिल्लामध्य प्रदेश इञ्चार्ज, प्रदेश अध्यक्ष तथा प्रदेशका सम्पर्क समितिका इञ्चार्ज गोरखाले नै पाएको छ । त्यस्तै माओवादीको जातीय मोर्चा दलित मुक्ति संगठन तथा संवद्ध संगठनहरुको इञ्चार्जको जिम्मेवारी पनि गोरखाका परशुराम रम्तेतलाई दिइएको छ । स्थायी समितिले विशेष समितिको अध्यक्षमा गोरखाकै लेखनाथ न्यौपानेलाई चयन गरेको छ ।

पार्टीको प्रदेश इञ्चार्ज, सहइञ्चार्ज र अध्यक्ष एमालेसित एकीकरण हुनुअघिकै संरचनालाई यथावत गरेको अध्यक्ष अधिकारीले जानकारी दिए ।

‘जिल्ला कमिटीका इञ्चार्ज तथा अध्यक्षहरु पनि एकीकरण हुनुअघिकैलाई यथावत गरिएको छ’, अध्यक्ष अधिकारीले भने, ‘जिल्ला सम्मेलनको मिति तोकिसकिएको छ । अब हाम्रो ध्यान जिल्ला सम्मेलन गर्नेतिर छ ।’