काठमाडौँ, ११ भदौ ।नेकपा एमालेले पार्टीले कारवाही गरेका व्यक्तिलाई नयाँ दल दर्ताका लागि सनाखत गराएको भन्दै निर्वाचन आयोगको भूमिकाप्रति प्रश्न उठाएको छ । आयोगको भूमिका दल विभाजनका लागि सहयोगी भएको एमालेको आरोप छ ।

पुष्पलाल स्मृति प्रतिष्ठानको कार्यालय च्यासलमा बिहीवार बसेको केन्द्रीय कमिटीको बैठकले पार्टीले कारवाही गरेका व्यक्तिलाई दल विभाजनका लागि सनाखत गराउने कामको कानूनी प्रतिवाद गर्ने निर्णय गरेको हो । 

‘निर्वाचन आयोगबाट केही विवादास्पद निर्णय भएका छन्, पार्टीले कारवाही गरेका व्यक्तिलाई सनाखत गराउन लगाउने गलत काम भएका छन्, यसको कानूनी प्रतिवाद गर्छौं,’ बैठकपछि प्रवक्ता प्रदीप ज्ञवालीले भने ।

सनाखत गर्ने भनेको हस्ताक्षर रुजु गर्ने भएपनि हस्ताक्षर नगरेका व्यक्तिलाई समेत सनाखत गर्न दिइएको ज्ञवालीले आरोप लगाए ।

एमालेले सांसदलाई गरेको कारवाहीको पत्र रोकेर प्रतिनिधि सभाका सभामुखले गम्भीर गल्ती गरेको समेत आरोप लगाएको छ । 

‘सभामुखबाट भएको गल्तीबारे कानूनसम्मत संसदीय अभ्यास अनुसारको निर्णय गर्छाैं,’ ज्ञवालीले भने, ‘सभामुखको भूमिका निष्पक्ष भएन भन्ने कुरा सम्बन्धित ठाउँमा भन्छौं । पदीय आचरणसम्मत कुरा भएन ।’ 

एमाले केन्द्रीय कमिटी बैठकले पार्टी विवाद समाधान गर्न भएको १० बुँदे सहमतिको व्यवस्थित ढंगले कार्यान्वयन गर्ने निर्णय पनि गरेको छ ।