भदौ १०

प्रदेश १ एमाले संसदीय दलको नेतामा भीम आचार्य चयन भएका छन्। बिहीबार विराटनगरमा बसेको एमाले संसदीय दलको बैठकले भीम आचार्यलाई सर्वसम्मतले संसदीय दलको नेतामा चयन गरेको हो।

बिहान ९ बजे नै संसदीय दलको बैठक बस्ने भनिए पनि शेरधन राई र भीम आचार्य काठमाडौंबाट आउन ढिलाई भएपछि विराटनगर विमानस्थल नजिकैको एसियाटिक होटलमा एमाले संसदीय दलको बैठक बसेको थियो।

एमाले संसदीय दलको नेतासमेत रहेका राईले राजीनामा दिने बताएका हुन्। उनले भीम आचार्यलाई दलको नेता बनाएको जानकारी संसद सचिवालयलाई गराइसकेका छन्।

एमाले संसदीय दलको बैठकले राईको राजीनामा र संसदीय दलको नेतामा आचार्यलाई बनाएसँगै नयाँ सरकार गठनका लागि प्रदेश प्रमुखलाई जानकारी गराउन उनीहरू प्रदेश प्रमुखको कार्यालयतिर जान लागेका छन्।

मुख्यमन्त्री शेरधन राईले राजीनामा दिएलगत्तै दलको बैठकले औपचारिक रुपमा दलको नेता भीम आचार्यलाई बनाएको र आज नै मुख्यमन्त्रीमा नियुक्तिका लागि प्रदेशप्रमुख समक्ष सिफारिस गर्ने तयारी थालेको हो।