दुई युवालाई ज्यान मार्ने उद्देश्यले सांघातिक आक्रमण गरेर फरार गुण्डा नाइके सन्ते समूहलाई कोहलपुर प्रहरीले पक्राउ गरी सार्वजनिक गरेको छ ।
साउन २४ गते राती नेपालगञ्ज उपमहानगरपालिका वडा नं. २० बस्ने पुरन वि.क. र टेक बहादुर वि.क.लाई सन्ते भनिने बसन्त रावत समूहले साँघातिक आक्रमण गरेर फरार भएकोमा प्रहरीले पक्राउ गरी बुधवार सार्वजनिक गरेको हो । सुर्खेत कालागाउँबाट फरार सन्ते सहित घटनामा संलग्न अन्य २ जनालाई सुर्खेत प्रहरीको सहयोगमा इलाका प्रहरी कार्यालय कोहलपुरको टोलीले मंगलवार साँझ पक्राउ गर्न सफल भएको हो । यस अघि घटनामा संलग्न अन्य ४ जनालाई कोहलपुर प्रहरीले पक्राउ गरी अनुसन्धानलाई अगाडी बढाएको थियो ।

घटना विवरण :
नेपालगञ्ज उप–महानगरपालिका २० थपुवा बस्ने १७ वर्षिय पुरन वि.क. र १८ वर्षिय टेक बहादुर वि.क. र गुण्डा नाइके सन्ते समूहसँग लामो समयदेखि दुश्मनी रहँदै आएको
थियो । फरक फरक टोलमा रहँदै आएका पीडितद्वय वि.क. र सन्ते समूहको बेला बेलामा सामान्य झडप तथा कुटाकुट भइरहेको हुन्छ । श्रावण २४ टेक बहादुर र पुरन वि.क.सुतेको घरको कोठा पत्ता लगाई सन्ते समूह उनीहरुलाई आक्रमण गर्ने योजना बनाउँछ । त्यो बीचमा टोलमा ५,६ घरमा समेत ढोका ढक्काउँदै वि.क. दाजुभाईलाई खोजी गरिरहेको सन्ते समूहमा त्यो दिन १०/१२ जनाको समूह हुन्छ । सन्ते समूहका युवाहरुसँग खुँडा, खुकुरी तरबार र भाला लगायतका घरेलु हतियार साथमा लिएका हुन्छन् । वि.क. दाजुभाई सुतेको कोठामा पुगेपछि सन्ते समूहले आक्रमण शुरु गर्छ । वि.क. दाजुभाईमध्ये टेक बहादुर आक्रमणबाट बच्न भाग्न सफल हुन्छन्् । सँगैका पुरनलाई सन्ते समूहले निर्घात रुपमा साँघातिक आक्रमण गरेपछि झाँडीमा फालेर उनीहरु भाग्छन् । त्यस क्रममा सो समूहले नै नजिकै बस्ने गिता रोकाको घर कोठाको ढोका समेत फुटाई नगद, सुनका गरगहना तथा अन्य जिन्सी सामानहरु लुटपाट गरेका हुन्छन् ।
गाउँलेले प्रहरीलाई खबर गरेपछि प्रहरी टोली घटनास्थलमा पुग्छ र अनुसन्धान शुरु गर्छ । गाउलेको सहयोगमा पुरन र टेकबहादुरलाई उपचारको लागि नेपालगञ्ज मेडिकल कलेज शिक्षण अस्पताल कोहलपुरमा प्रहरीले पु¥याउँछ । आक्रमणको समयमा भाग्न सफल टेक बहादुर सामान्य घाइते भएका हुन्छन्, एक हप्तामा उनलाई अस्पतालले डिस्चार्ज दिन्छ । तर पुरनको स्वास्थ्य अवस्था जटिल हुँदै गएपछि शिक्षण अस्पताल कोहलपुरले काठमाण्डौमा रहेको किर्तिपुर अस्पतालमा थप उपचारका लागि रेफर गरिदिन्छ । पुरनको टाउको, खुट्टा, गर्धन लगाएत शरिरका अन्य भागमा गम्भिर चोट लागेका कारण १६ दिनको उपचारपछि स्वास्थ्यमा सुधार आएपछि किर्तिपुरबाट फर्किएर शिक्षण अस्पताल कोहलपुरमा हाल पुरन उपचारकै क्रममा छन् ।

प्रहरी अप्रेशन :
साँघातिक आक्रमणका पीडित परिवारले ११ जनाको नाममा किटानी जाहेरी प्रहरीमा दर्ता गरेपछि घटनामा संलग्न सन्ते समूहको खोजी कार्यलाई प्रहरीले तिब्र पार्छ । प्रहरीले घटनामा संलग्न २ जना युवा दिपक चदरा र टेक बहादुर चदरालाई नेपालगञ्जबाट पक्राउ पर्छन् । त्यसपछि प्रहरीले घटनामा संलग्न भनिएका व्यक्तिका आफन्तसँग सोधपुछ, फोन ट्रेसिङ्ग, सामाजिक सञ्जाल, खुला सिमाना नाकामा गोप्य रुपमा निगरानी बढाएको प्रहरीले त्यसको एक सातामा अन्य २ जना युवालाई पक्राउ गर्न सफल हुन्छ । घटनाको मुख्य नाइके सन्ते रहेको पाइएपछि प्रहरीले सन्तेलाई पक्राउ गर्न विशेष अनुसन्धान कार्यलाई जारी राख्छ । यस बीचमा सन्ते वैदेशिक रोजगारको लागि विदेश जाने तयारी गरेको त्यसको लागि भिसा आइसकेको तर भिसा रद्द भएको जानकारी प्रहरीले पत्ता लगाउँछ । भिसा रद्द भएपछि सन्ते भारत सम्म पुगेको प्रहरी अनुसन्धानबाट खुलेपछि सन्तेको खोजी कार्य अझ तिब्र पार्छ प्रहरीले । सन्ते सुर्खेतमा लुकिछिपी बसिरहेको भन्ने गोप्य सूचना कोहलपुर प्रहरीलाई पुग्छ र सुर्खेत प्रहरीसँग समन्वय गर्दै इलाका प्रहरी कार्यालय कोहलपुरबाट खटिएको सादा पोषाक सहितको टोलीले सुर्खेत कालागाउँबाट गुण्डा नाईके ‘सन्ते’ सहित उनका सहयोगीहरु २० वर्षिय प्रकाश बुढा र नविन थापालाई पक्राउ गर्न सफल भएको इलाका प्रहरी कार्यालय कोहलपुरका प्रहरी निरीक्षक होम प्रकाश चौधरी बताउँछन् ।