काेहलपुर/ के तपाईसँग आफ्नाे मोटरसाइकल छ ? अथवा कोही चिनजान वा आफन्तको मोटरसाइकल लिएर आफ्नाे गन्तव्यमा जाँदै हुनुहुन्छ ? यदि यसो हो भने तपाई चनाखो हुनुपर्ने भएको छ । नेपाली समाजमा एउटा उखान छ “आँखा झिमिक्क माल गायब”, पार्किङ्ग गरिराखेको मोटरसाइकल कोहलपुर क्षेत्रमा जहाँबाट पनि निमेषभरमै चोरी हुन सक्छ । यसतर्फ मोटर साइकलमा सवार हुने व्यक्ति अत्यन्तै चनाखो हुनुपर्ने देखिएको छ ।

विगत ६ महिनाभित्र कोहलपुर क्षेत्रबाट २ वटा स्कुटर सहित ३३ वटा मोटरसाइकल चोरी भइसकेका छन् । सबैभन्दा संवेदनशील कुरा त बुधवार इलाका प्रहरी कार्यालय कोहलपुर परिसरबााट एकजना सेवाग्राहीको मोटरसाइकल चोरी भएको छ । इलाका प्रहरी कार्यालय कोहलपुरमा केही कामले दिउँसो २ बजे प्रबेश गरेका कोहलपुरका मानबहादुर शाही काम सकेर वाहिर फर्कदा प्रहरी कार्यालयको गेट नजिक पार्किङ्ग गरिराखेको भे १० प ३५३६ नम्बरको १५० सीसी रातो/कालो पल्सर मोटरसाइकल नै चोरी भएको छ ।

किन बढ्दैछ मोटरसाइकल चोरी ?

कोहलपुर क्षेत्र शान्ति सुरक्षाको विषयमा अत्यन्तै संवेदनशील क्षेत्र मानिन्छ । यस क्षेत्रमा एउटा विशेष समुदाय तथा वर्गमात्र छैन । हरेक वर्ग र समुदाय लामो समयदेखि कोहलपुरमा रहिआएका छन् । मोटरसाइकल चोरी गर्ने एउटा गिरोह लामो समयदेखि कोहलपुर क्षेत्रलाई ट्रान्जिट बनाएर चोरीका घटनाहरु दिनप्रतिदिन बढाइरहेका छन् । पछिल्लो ६ महिनाको तथ्यांकलाई मात्र हेर्ने हो भने पनि यो कुरालाई पुष्टि गरेको छ । विशेष गरी कोहलपुर क्षेत्रमा वेरोजगार युवा र दुव्र्यवसनीको लतको सिकार भएका युवाहरुको ठुलै जमात छ । मोटरसाइकल चोरी गर्ने गिरोहले पनि यसै कुरालाई ध्यानमा दिँदै वेरोजगार युवा तथा दुव्र्यवसनीको लतको सिकार भएका युवाहरुलाई प्रयोग गरेको अनुमान गर्न सकिन्छ । वेरोजगार युवाहरु तत्काल आर्थिक समस्या समाधान गर्न जस्तो सुकै काम गर्न पनि तयार हुन्छन् भने लागु पदार्थ तथा दुव्र्यवसनीको सिकार भएका युवाहरु आफ्नाे लत मेट्न पनि जस्तो सुकै काम गर्न पनि पछि पर्दैनन् । यो समस्याको प्रमुख कारण पनि यही हो ।

जिम्मेवार को/ प्राविधिक समस्या के ?

समाजमा शान्ति सुरक्षा, अमनचयन कायम राख्ने प्रमुख दायित्व प्रहरी प्रशासनकै हो । तर प्रहरी कार्यालय परिसरबाटै मोटरसाइकल चोरी भएपछि प्रहरीको शान्ति सुरक्षा प्रत्याभूती गर्ने उत्तरदायित्वमाथि नै प्रश्न चिन्ह खडा भएको छ । नगरका विभिन्न स्थानमा हुने गतिविधीहरु सिसि क्यामराको निगरानीबाट शान्ति सुरक्षा मजबुद पार्ने प्रयास गरिएपनि इलाका प्रहरी कार्यालयमा रहेको सिसि क्यामरा हाल चालु अवस्थामा नरहेकाले बुधवारप्रहरी कार्यालय परिसरबाट चोरी भएको मोटरसाइकल खोजीमा थप चुनौती देखिएको छ । इलाका प्रहरी कार्यालय कोहलपुरमा कार्यरत प्रहरी निरीक्षक होम प्रकाश चौधरीले कार्यालय परिसरबाट मोटरसाइकल चोरी भएको पुष्टि गर्दै चोरीमा संलग्नको पहिचान गरी पक्राउ गर्न कुनै कसर बाँकी नराख्ने बताएका छन् । तर प्रहरी कार्यालयमा राखिएका सिसि क्यामरा विग्रेको लामो समय भइसक्दा पनि बनाएर आफ्नाे कार्यालयलाई निगरानीमा राख्न नसक्नु प्रहरीको कमजोरी देखिएको छ । यो कुरा प्रहरी निरीक्षक चौधरीले पनि स्विकारेका छन् । प्रहरीको व्यापक गस्ती तथा निगरानी नगर क्षेत्रमा बढाइएको खण्डमा चोरीका घटनाहरु क्रमिक रुपमा कमी आउनेमा दुइमत छैन ।

६ महिना यता कति चोरी भए मोटरसाइकल

यही २५ गते खाजा खान कोहलपुर शीत भण्डार नजिक रहेको रातो भाले कटेज पुगेका स्थानिय भिम सिंह ठकुरीको २२० सीसी निलो पल्सर साँझ ८ देखि ९ बजेको समयमा चोरी हुन्छ । एक दिन अगाडी सोही स्थानबाट एउटा पल्सर मोटरसाइकल पनि चोरी भएको थियो । यस्तै २ हप्ता अगाडी बैजनाथ निवासी आकाश रुचालको भे १० प १९७७ को निलो पल्सर पनि घरबाटै चोरी भएको थियो । यि त प्रतिनिधी घटनामात्र हुन्, कोहलपुर क्षेत्रमा मोटरसाइकल चोरी सम्बन्धमा । मोटरसाइकल मात्र नभई २ वटा स्कुटर पनि कोहलपुर क्षेत्रबाट चोरी भएका छन् । २ स्कुटर सहित ३३ मोटरसाइकल चोरी भएकोमा प्रहरीले एउटा मात्र मोटरसाइकल फेला पारी सवारी धनीलाई बुझाउन सफल भएको छ । २ जनाको इलाका प्रहरी कार्यालय कोहलपुरमा मुद्धा दर्ता भएकाले फेला परेका २ वटा मोटरसाइकल प्रहरी कार्यालय परिसरमै सुरक्षित राखिएको छ भने चोरी भएका ३३ सवारी सम्म अझैपनि प्रहरी पुग्न सकेको छैन । छ महिनायता कोहलपुर क्षेत्रबाट लु २० प ३३४, भे ८ प ३२७९, भे १० प १०५०, भे १० प, ८७७, भे ८ प ६८६९, भे ९ प ८२९९, भे १० प ४३६२, भे ११ प, १६७९, भे ६ प ९५९३, भे १० प ५८६२, भे ११ प ४९९४, क.प्र.०२–००–१प ५२३, लु ७२ प २४९९, भे ६ प २९४०, भे ७ प २९०, भे ३ प ६१६, भे ९ प ७४९४, क.प्र.नं ०२–००१ प ५४२४, भे १० प २४५, भे ११ प ३७२७, भे ११ प ३७२७, भे १० प ४३१९, भे ९ प ९७९९, भे ८ प ५९९०, भे ११ प ४९२, भे ३ प ९१४, भे ८ प २७५४, भे १० प १९७७, बा.प्र. ०२०१९ प ४८९, भे ९ प ५६०२, भे ११ प ३७२३, भे ११ प ३४६०, भे १० प ३५३६, भे ७ प ५४८९, भे ९ प २९३३ नम्वरका सवारी चोरी भएका वा हराएका छन् ।

चोरको चोरी गर्ने तरिका :

कोहलपुर शीत भण्डार नजिक अनमोल गेष्ट हाउस वाहिर पार्किङ्ग गरिराखेको मोटरसाइकल चोरी भएको घटना सिसि क्यामरामा कैद भएको थियो । सिसि क्यामरामा कैद भएको दृश्यमा चोरले पहिले मोटरसाइकल पार्किङ्ग गरिराखेको स्थान वरपर धेरैपटक रेकी गर्दै मोटरसाइकल पहिचान गर्ने काम गर्छ । त्यसपछि मोटरसाइकल वरिपरीको बस्तुस्थिति हेर्छ र मोवाइलमा गफ गरे जस्तो बहानामा मोटरसाइकल वरिपरी घुमिरहन्छ र मोटरसाइकल चोर्न सहज परिस्थिती बनेको महशुस गरेसँगै उसले मोटरसाइकलको हेन्डल नजिकै रहेको तार काटी डाइरेक्ट स्टार्ट गर्छ र मोटरसाइकल हावाको वेगसरी हुइक्याउँछ ।

बीमाले के गर्छ ?

सवारी धनीले चोरी भएको जानकारी दिएपछि बीमा कम्पनीहरुले भुक्तानीको प्रक्रिया अगाडी बढाउँछ । चोरी भएको वा हराएको पुष्टि प्रहरीले गरेपछि बीमा कम्पनीले आफ्नाे तवरबाट पनि घटनाको अनुसन्धान गरेर प्रतिवेदन तयार पार्ने गर्छ । पूर्ण बीमा गरेको सवारी धनीले प्रयोग गरेको सवारीको अवस्था अनुसार नयाँ भर्खरै खरिद गरेको खण्डमा ९० देखि ९५ प्रतिशत सम्म भुक्तानी दिने व्यवस्था छ भने पुरानो सवारीको हकमा मूल्यांकनका आधारमा ह्रास कट्टी गरेर बीमा कम्पनीबाट सवारी धनीले भुक्तानी लिने गरेका छन् । यस कारण मोटरसाइकल चोरी भएका वा हराएका सवारी धनीले बीमाबाट जे जति भुक्तानी पाउँछन् यसैमा चित्त बुझाउने गर्ने गरेकाले प्रहरीलाई पीडित पक्षबाट जति दवाव सिर्जना गर्नुपर्ने हो त्यो गरेको देखिदैन । जसले गर्दा यस सम्बन्धमा प्रहरी प्रशासन कडा रुपमा खोजी कार्यलाई अगाडी बढाएको नहुनसक्छ, जसले गर्दा चोरी गर्ने गिरोहले प्रश्रय त पाइरहेको छैन ? सोच्नुपर्ने बेला आएको छ ।