कोहलपुरमा लकडाउनको समयमा घरबहाल छुट गर्ने २६ जना घरधनीलाई सम्मान गरिएको छ । कोरोना भाइरस कोभिड–१९ महामारीको समयमा घरबहाल छुट गर्ने घरधनीहरूलाई कोहलपुर उद्योग वाणिज्य संले सम्मान गरेको हो । कोहलपुरमा आयोजित कार्यक्रममा घरबहाल छुट गर्ने घरधनीहरूलाई कदरपत्रले सम्मान गरिएको हो । कोभिड–१९ को संक्रमण फैलिन नदिनका लागि सरकारले लकडाउन गरेपछि व्यापार व्यवसाय ठप्प भएकाले आफ्नो घरमा बहालमा बस्नेहरूलाई सहज होस् भन्ने उद्देश्यले कोहलपुरमा कतिपय घरधनीले स्वतःस्फूर्तरूपमा निश्चित समयको घरबहाल छुट गरेका थिए । कार्यक्रममा बोल्दै उद्योग वाणिज्य संघका केन्द्रिय सदस्य चक्र अधिकारीले कोरोना महामारीको असामान्य परिस्थितिमा घरबहाल छुट गर्ने घरधनीलाई धन्यवाद दिँदै घरभाडा र कोहलपुरको व्यावसायिक प्रतिष्ठानबीच अन्तरसम्बन्ध रहेको उल्लेख गर्नुभयो ।केही व्यक्तिले गरेको यो काम उदाहरणीय भएको बताउँदै सकेसम्म सबैलाई केही समयको भए पनि घरभाडा छुट गर्न घरधनीहरूलाई आग्रह गर्नुभयो । यो परिस्थितिमा बहालमा बस्ने तथा व्यवसाय गर्नेलाई बहाल छुट गर्ने उदाहरणीय काम भएको बताउँदै घरधनी तथा बहालमा व्यवसाय गर्ने दुवै पक्षको लगानीको सुरक्षा गर्ने सरकारको काम भएको उद्योग वाणिज्य संघका अध्यक्ष लक्ष्मण पौडेलले बताउनुभयो ।कार्यक्रममा कोहलपुर नगरपालिका वडा न ११ का वडा अध्यक्ष कर्ण बहादुर थापा , आन्तरिक राजस्व कार्यलय प्रमुख शरद चन्द ,कर अधिकृत राजेन्द्र पाण्डे , चिन्तामणी धिताल लगायतको सहभागिता रहेको थियो ।