कोहलपुर/नेपाली समाजमा एउटा उखान छ, “चोरको हजार दाउँ” भन्ने । पछिल्लो समयमा कोहलपुर क्षेत्रमा भइरहेका चोरीका घटनाहरुमा संलग्न व्यक्ति तथा समूहहरु सजिलै उम्कन सफल भएपछि प्रहरीलाई दवाव थियो । चोरीका घटनाहरु नियन्त्रणमा प्रहरीले चालेका हरेक कदमहरु प्रभावकारी बन्न सकिरहेको थिएन ।

चोरीमा संलग्न व्यक्ति तथा समूहले नयाँ चोरीको शैली अपनाएपछि प्रहरी चोरसम्म पुग्न समस्या छदै थियो त्यसमा पनि चोरी गर्ने समूह फिल्मी शैलीमा चोरीका गतिविधीहरु बढाइरहेका थिए । अन्ततः प्रहरीको सक्रियता बढाइसँगै फिल्मी शैलीमा चोरीजन्य गतिविधीहरु सञ्चालन गर्दै आइरहेको एउटा समूहको सदस्य कोहलपुर प्रहरीले पक्राउ गरेको छ । प्रहरीले एक युवालाई नियन्त्रणमा लिएपछि प्रहरीले चोरीमा संलग्नहरुले चालेको नयाँ फिल्मी शैलीबारे न्यूज नमस्तेलाई प्रहरीले जानकारी दिएको हो ।

चोरी भएका स्थानहरु :

यसै वर्षको जेठ ३० गते राती १२ बजेपछि कोहलपुर दश विगाह उत्तरगेट तर्फ रहेको किराना पसलमा लगाएको ताला फोडेर २०/२२ हजार चोरी हुन्छ, त्यसै रात बसपार्कको एक होटलबाट २ लाखको हाराहारीमा चोरी हुन्छ । यस्तै असार ८/९ गतेतिर बसपार्क पूर्वतिर रहेको एक होटेलबाट फेरी ३/४ हजार चोरी हुन्छ । असार १४ गते न्यूरोडको एक मिठाई पसल, १५ गते गोलपार्क नजिकमा रहेको एक घुम्ती पसल, १६ गते वसपार्क पछाडी रहेको एक किराना पसल, असार १७ गते दश विगाह क्षेत्र पछाडी रझेना जाने बाटो नजिकको किराना पसल ताला फोडेर चोरी हुन्छ । असार १८ गते विद्युत कार्यालय नजिक रहेको एक सुकुटी पसलबाट एक थान मोवाइल चोरी हुन्छ यो क्रम असार २३ गतेसम्म चलिरहन्छ । यो बीचमा असार १९ गते चप्परगौडी पम्म भित्र रहेको चिया पसल र सोही रात एनटिभी रोडमा रहेको एक किराना पसलमा पनि चोरीको घटना घट्छ । यो समूहले असार २१ गते राती १२ बजेको समयमा सम्झना चोकदेखि भित्रको गाउँमा पुगेर सुन चोरी गरेर नेपालगञ्ज एकलाइनीस्थित एक पसलमा १२ हजारमा विक्री समेत गर्न सफल हुन्छन ।

चोरीको उद्देश्य :

के उद्देश्यका लागि यो समूह चोरी कार्यमा सक्रिय भयो भन्ने सवालमा यो समूहले आफ्नाे आवश्यकता पुरा गर्न ३ सय रुपैयाँ देखि जे हातमा पर्छ ती कुनै पनि सामान तथा नगद चोरी गर्दै मदिरा सेवन र रमाइलोमै आफ्ना गतिविधीहरु सञ्चालन गर्ने गरेको पक्राउ परेका युवाले प्रहरीसमक्ष बयान दिएका छन् । पक्राउ परेका युवासँग प्रहरीले लिएको बयान अनुसार रमाइलो गर्न र मस्ती गर्नकै लागि चोरीजन्य गतिविधीहरु आफुहरुले सञ्चालन गर्दै आइरहेका थिए । यतिसम्म कि यो समूहका युवाहरु दिनभर नेपालगञ्ज बागेश्वरी मन्दिर परिसरमा गएर सुत्ने र रातको समयमा सक्रिय रुपमा चोरी गर्ने गरेको प्रहरीले बताएको छ । सुर्खेतमा रहँदा वेराेजगारी भएका कारण सानाे तिनाे चाेरी गरेर माेजमस्तीका गर्नका लागि काेहलपुर आएकाे बताउँछन् ।

कसरी बन्यो चोरी गर्ने योजना :

सुर्खेत स्थायी बसोवास गर्ने ५ जना वेरोजगार युवाहरु सुर्खेतमा भेटघाटका क्रममा मदिरा पिउँदै एक योजना बनाउँछन् । योजना अनुसार उनीहरुलाई अब रमाइलो र मस्ती गर्न आर्थिक समस्या बढ्दै गएपछि समूहगत रुपमा चोरी गर्ने गोप्य योजना बनाउँछन् । सुर्खेतमा चोरीका गतिविधी सञ्चालन गर्दा स्थानीयहरुले चिन्ने भएकाले आफुहरुलाई नचिन्ने ठाउँमा चोरी गर्ने त्यसका लागि कोहलपुर, नेपालगञ्ज क्षेत्र उपयुक्त क्षेत्र भएको भन्दै कोहलपुर क्षेत्रमा चोरी गर्ने मनसायले ५ जना युवाहरु सुर्खेतबाट कोहलपुर आउँछन् । कोहलपुर दश विगाह नजिक चिनजान नभएको घरवेटीको घरको कोठा लिएर कोहलपुरमा बस्न थाल्छन् । अनि शुरु हुन्छ शिलसिलेवाररुपमा चोरीका गतिविधीहरु । यो समूह कोहलपुर क्षेत्रमा सक्रिय भइरहेका हुन्छन् ।

कसरी पक्राउ परे चोर ?
चोरीको घटनालाई बढो चलाखीपूर्ण र कुशलतापूर्व चोरी गर्ने क्रममा कोहलपुर प्रहरीले यही श्रावण २६ गते राती दश विगाह जाने बाटोनजिक रहेको एक किराना पसल चोरी गरिरहेको अवस्थामा एक युवालाई प्रहरीले नियन्त्रणमा लिन्छ र पक्राउ परेका युवाले दिएको वयानले चोरीमा संलग्न व्यक्ति तथा समूह कतिसम्म चतुरता र सावधानी अपनाउँने गरेका रहेछन् रहस्य पर्दाफास हुन्छ । चाेरी गर्ने समूहका एक युवा प्रहरी फन्दामा परेपछि उनीहरुको गतिविधीमा पूर्णविराम लाग्छ । चोरीमा संलग्न अन्य ४ जना युवाहरु कोहलपुर क्षेत्रभन्दा वाहिर रहेको र उनीहरुलाई पक्राउ गरेर आवश्यक कारवाही प्रक्रिया अगाडी बढाउने तयारी भइरहेको इलाका प्रहरी कार्यालय कोहलपुरका डिएसपी रबिन्द्र खनाल बताउँछन् ।
(चोरीमा संलग्न समूहका व्यक्तिहरुको नाम ठेगाना गोप्य राखिएको छ । –सम्पादक)