प्रदिप आचार्य
कोहलपुर/ के तपाईले नयाँ घर निर्माणपछि विभिन्न प्रयोजनका लागि निर्माण गरिएका पानी जम्मा हुने खाल्डा तथा संरचनाहरुको उचित व्यवस्थापन समयमै नगरेर मानविय जोखिम त बढाइरहनुभएको छैन ? घर धनीले यस विषयमा अति नै संवेदनशील बन्नुपर्ने देखिएको छ । कोहलपुरमा आज यसै कारण एक अबोध वालिकाले ज्यान गुमाउनु परेको छ ।

शनिवार विहान १० बजेतिर स्थानिय नेकपा एमाले नेतृ बसन्ती अधिकारीले निर्माण सम्पन्न गरेको घरको भुइतलामा रहेको पानी भण्डारण गर्ने संरचनामा डुवेर साढे २ वर्षकी रिना शर्मा नावालिकाले अकालमै ज्यान गुमाएकी छिन् । प्रहरीका अनुसार साढे ३ तलाको घर अधिकारी परिवारले भर्खरै निर्माण सम्पन्न गरेका थिए ।

नयाँ घरको पुजा गरेर घर सर्ने तयारी त अधिकारी परिवारले गरेका रहेछन् तर घर निर्माण गर्दा पानी भण्डारण प्रयोजनका लागि निर्माण गरेको संचरनालाई व्यवस्थापन समयमै गरेको भए वालिकाको काल पक्कै बन्ने थिएन, त्यो संरचना । घरको भुइतलामा रहेको कोलिया भित्र पानी भण्डारण गर्न बनाइएको संरचनाले मानविय जोखिम बढाउन सक्ने सम्भावित घटनाबारे थोरै पनि संवेदनशील बनेको भए आज एक अबोध वालिकाको सुन्दर जीवनमा पुर्णविराम पक्कैलाग्ने थिएन ।

बर्दिया बढैयाताल गाउपालिका १ स्थायी घर भई हाल मृतकका वुवाले कोहलपुरमा माछा र फ्रेस हाउस तथा नास्ता पसल सञ्चालन गर्दै आइरहेका थिए । सानो तिनो व्यवसाय सञ्चालन गर्दै बर्दियाबाट आप्mनो र आप्mनो सन्तानको उज्ज्वल भविष्यको सपना साकार पार्न कोहलपुर आएका मृतक परिवारले भोग्नुपरेको पीडाको प्रमुख कारण भनेकै घरधनीको चरम लापरवाही नै देखिन आउछ । वाल्यकालमा जो कोही बच्चा पनि चञ्चल स्वभावको हुन्छ नै । मृतक वालिका खेल्ने क्रममा अधिकारीको घरमा पुगेको हुनुपर्छ र पानी भण्डारणका लागि निर्माण गरिएको संरचनामा डुब्दा एक अबोधवालिकाको जीवनलीला नै समाप्ती भयो । भर्खरै मात्र निर्माण सम्पन्न भएको घरका घरधनीले सम्भावित जोखिमलाई मध्यनजर गर्दै ट्यांकीलाई सुरक्षित तरिकाले ढक्कन लगाएको भए वा छोपेको भए वालिकाको ज्यान जोगिने थियो तर यस किसिमका घटनाहरु भवितब्य नै हुने गरेका कारण सम्बन्धित व्यक्तिहरु सजक हुनुपर्ने स्थानीयबासी बताउँछन् ।

घरधनीको लापरवाहीका कारण अकालमै वालिकाको ज्यान गएपछि इलाका प्रहरी कार्यालय कोहलपुरमा उद्योग वाणिज्य संघ, पीडित परिवार र घरधनीबीच छलफल समेत भएको थियो ।
छलफलमा पीडित परिवारलाई क्षतिपूर्ति वापत मृतक नाबालिका रिनाको सम्झनामा स्मारिका निर्माणका लागि एक लाख रुपैंया दिने सहमति भएको छ । मृतकका अभिभावक, नेकपा एमालेकी नेतृ बसन्ती अधिकारी, नेकपा एमालेका बलराम भट्टराई, उद्योग वाणिज्य संघका अध्यक्ष लक्ष्मणराज पौडेल, कोषाध्यक्ष सिता कार्की लगाएत बुद्धिजिवि, समाजसेवीहरुबीच भएको छलफल प्रहरीका लागि एकदमै नयाँ र रचनात्मक रहेको प्रहरीले टिप्पणी गरेको छ ।