कोहलपुर/बाँके जिल्ला कोरोना संक्रमणको उच्च जोखिममा पुनः देखिन थालेको छ । दुई महिना यता सबैभन्दा बढि संख्यामा शुक्रवार ४८ जना संक्रमित पुष्टि गरिएको छ । जिल्लाका तीन वटा प्रयोगशालामा २०७ नमुना परीक्षण गर्दा शुक्रवार थप ४८ जनामा संक्रमण पुष्टि भएको जिल्ला कोभिड–१९ व्यवस्थापन केन्द्रका फोकलपर्सन तेज वलीले जानकारी दिएका छन् ।
जिल्लाका तीन प्रयोगशाला अन्र्तगत भेरीको प्रयोगशालामा १०९ नमुना परीक्षण गर्दा ३२, मेडिकल कलेज कोहलपुरमा ४९ नमुना परीक्षण गर्दा १० र बागेश्वरी प्रयोगशालामा पनि ४९ परीक्षण भएकोमा ६ जनामा भाइरस संक्रमण पुष्टि भएको छ ।
आज संक्रमण पुष्टि भएकामध्ये बाँकेका १३, बर्दियाका २३, दाङका ७ र ५ जना अन्य जिल्लाका भएको बताइएको छ । योसँगै बाँकेमा कोरोना भाइरस संक्रमितको संख्या १७ हजार ७ सय ६ पुगेको छ । विहिवार बाँकेमा २३ जनामा कोरोना संक्रमण पुष्टि भएकोमा २१ जना संक्रमित कोहलपुर क्षेत्रका रहेका थिए ।