काेहलपुर/ बाँके राष्ट्रिय निकुञ्जमा बाघको संख्या बढ्दै गएको छ । निकुञ्ज स्थापना हुँदा चार वटा मात्र बाघ रहेकोमा हाल आएर २५ भन्दा बढी पुगेको निकुञ्जले जनाएको छ ।

पाटेबाघको संरक्षणका लागि ११ वर्षअघि स्थापना गरिएको देशकै कान्छो राष्ट्रिय निकुञ्ज ५५० वर्ग किलोमिटर क्षेत्रफलमा फैलिएको छ । स्थापना हुँदा ४ वटा मात्र बाघ रहेको र आठ वर्षपछि गरिएको गणनामा २१ वटा पुगेको जानकारी दिदै हाल २५ भन्दा बढी रहेको आ‌क‌लन निकुञ्जले गरेको छ । निकुञ्जमा पाटेबाघको संख्या बढ्दै गरिएकोले बाघको वासस्थान र आहारा प्रजाती व्यवस्थापनलाई जोड दिईरहेको निकुञ्जले जनाएको छ ।

विश्वमै लोपउन्मुख रहेको पाटेबाघ संरक्षणका लागि निकुञ्जले तारबार, पोखरी, वनपथ, घाँसे मैदान, मचान, सुरक्षा पोष्ट लगायतका पुर्वाधार निर्माण र आहारा प्रजाती संरक्षणका लागि विभिन्न काम गरिरहेको बताइएकाे छ । निकुञ्जले बाघ हेर्न आउने पर्यटकका लागि धेरै पूर्वाधार तयार भईसकेका र अझै पूर्वाधार बनाउने योजनामै रहेको निकुञ्जले जनाएको छ ।

बाँके राष्ट्रिय निकुञ्जभित्र बाघ अहिले आफ्नै प्राकृतिक बासस्थानमा रमाईरहेको निकुञ्जका सहायक संरक्षण अधिकृत एवम् सूचना अधिकारी महेश न्यौपानेले जानकारी दिनुभएको छ । निकुञ्जमा पाटेबाघको संख्या बढेसँगै संरक्षणमा अनेक चुनौती थपिएको न्याैपानेले बताउनुभयाे । बाघको संख्या बढेपनि बासस्थान क्षेत्र विस्तार गर्न कठिनाई हुनु, चोरी शिकार नियन्त्रण नहुनु, मानव र बाघबीच द्वन्द्व हुनु, निकुञ्ज क्षेत्रमा विकासका पुर्वाधार निर्माण गरिने संरक्षणका चुनौती रहेको छ । बाँके, दाङ र सल्यान जिल्लाको अधिकांश भू–भागलाई निकुञ्जको मध्यवर्ती क्षेत्रले छोएको छ ।