रुकुम/पछिल्लो समयमा बलात्कारका घटनाहरु बढ्दै गइरहेका छन् । विभिन्न जिल्लामा बलात्कार पछि हत्या भइरहेका घटनाहरुमा कमि आउन सकेको छैन् । यकातर्फ बलात्कारका घटनाहरुलाई जबरजस्ती मिलापत्र गर्न खोजिरहेका घटनाहरु पनि बाहिरिएका छन् ।

यता बलात्कार घटनामा मिलापत्र गरेको आरोपमा रोल्पामा वडासदस्यसहित सात जना पक्राउ परेका छन् । जेठाजुबाट बुहारी बलात्कार भएको घटनालाई गाउँमै मिलापत्र गरेको आरोपमा प्रहरीले लुङ्ग्री गाउँपालिका–४ का वडा सदस्य हिमबहादुर विष्टसहित अन्य ६ जनालाई प्रहरीले पक्राउ गरेको हो ।

पीडितको उजुरीको आधारमा बलात्कारको आरोपीसहित मिलापत्र गराउने स्थानीय दुर्गे विष्ट, नवीन विष्ट, पुस्त विष्ट, पुस्ते खड्का र पीडितका ससुरालाई पक्राउ गरिएको जिल्ला प्रहरी कार्यालय रोल्पाका डीएसपी नरेशराज सुवेदीले जानकारी दिए । गएको साउन २ गते भएको घटनालाई पीडितका ससुराले वडा सदस्यलाई खबर गरेपछि वडा सदस्यले साउन ३ गते गाउँमा कटुवालमार्फत स्थानीय भद्र भलाद्मी बोलाएर २० हजारमा मिलापत्र गराएका थिए । जसमध्ये गाउँको कोषमा १५ हजार र पीडितलाई ५ हजार छुट्याउने भेलाले निर्णय गरेको थियो । पीडितलाई छुट्याइएको ५ हजार रुपैयाँबाट पनि १ हजार भलाद्मीलाई चिया खर्च र ५ सय ससुरालाई मान राख्ने भनेपछि पीडितले असन्तुष्टि जनाउँदै साउन ४ गते प्रहरीमा जाहेरी दिएपछि घटना बाहिर आएको हो ।

पक्राउ परेकाहरूलाई इलाका प्रहरी कार्यालय सुलिचौरमा राखेर अनुसन्धान भइरहेको प्रहरीले जनाएको छ । बलात्कार आरोपितलाई कसुरबमोजिम र अन्यलाई घटनाको मतियारको कसुरबमोजिम कानुनी कारबाही हुने डिएसपी सुवेदीले बताए । पीडित महिलाले साउन ४ गते प्रहरीसमक्ष जाहेरी दिएकी थिइन् ।