कोहलपुर/बाँकेको कोहलपुर नगरपालिकाले हरेक वर्ष सडक निर्माण तथा मर्मत सम्भारका लागि करोडौँ रकम खर्च गर्दै आएको छ । निर्वाचित जनप्रतिनिधी आएपछि कोहलपुरका सबै वडाहरुमा सडक मर्मत र निर्माणका कार्यहरु तिव्र गतिमा भए । तर निर्माण भएका सडक सञ्जालहरु महिना दिन नपुग्दै जिर्ण अवस्थामा रहेका छन् ।

कर्मचारी, जनप्रतिनिधी र जनप्रतिनिधीका कार्यकर्ताहरुलाई उक्त योजनाहरु संचालन गर्न दिदा वर्षेनी करोडौँका योजनाहरु महिनौ दिन नपुग्दै जिर्ण बन्न पुगेका छन् ।
प्रभावकारी अनुगमन नहुन, प्राविधिक स्टमेट अनुसार निर्माण कार्य नहुँन र कर्मचारीले कमिशनको भरमा अपरिपक्क निर्माण भएका योजनाहरु सहजै कार्यसम्पन्नको भुक्तानी दिनुले कोहलपुर नगरपालिकामा निर्माण भएका सडकको अवस्था झन जिर्ण बनेको छ ।

असारे वजेटमा करोडौँको रकम नगरपालिकाका कर्मचारी र जनप्रतिनिधी र उनैका कार्यकर्तालाई वितरणमुखी बजेट स्वाहा भएको छ । यता कोहलपुर नगरपालिका वडा नम्बर १२ खड्कवार प्रवेशद्वार एबम बाँके राष्ट्रिय निकुञ्जको पर्यटकिय स्थल हात्तीसार जाने बाटोमा पक्कि बाटो माथी ग्राभेल (ढुङ्गा) बिच्छ्याएर असारे बजेट स्वाहा परिएको हो ।
उक्त बाटोमा केही खाल्डाहरु रहेको हुँदा, खाल्डो पुर्न भन्दै लाखौ रकमको ढुङ्गा, गिटि बाटोमा फालियो । तर पक्की बाटोमा ग्राभेल र ढुङ्गा हाल्दा स्थानीयलाई हिडडुल गर्न समेत असहज भएको स्थानियबासीहरु बताउँछन् । पक्की बाटो मर्मत गर्ने बहानामा जनताको कर बाट उठाएको पैसा दुरुपयोग गर्दै केही टिपर ढुङ्गा, गिटि फालेर जनप्रतिनिधिको र कर्मचारीको मिलेमतोमा कमिशनको चलखेल भएको स्रोत बताउँछ ।

पक्की बाटो सामान्यतया भत्किए पछि कि नयाँ निर्माण गर्ने वा भएको वाटो लाई मर्मत सम्भार गर्ने प्रावधान रहेको छ । तर पक्की बाटोको खाल्डा पुर्ने बहानामा नामको मात्र उपभोक्त समिती निर्माण गरि सस्तो मुल्यको ढुङ्गा गिटिलाई बाटोमा अव्यवस्थित तरिकाले फाल्दै पैसा दिने र आफ्ना कार्यकर्ता पोस्ने काम कोहलपुर नगरपालिकाले गरेको छ ।