रुकुम पूर्व / सिस्ने गाउँपालिका–३ र ४ का स्थानीयलाई गाउँबाहिर निस्कनै मुस्किल परेको छ । पश्चिममा पुमाखोला उर्लिएको छ । दक्षिणमा सानीभेरी नदीको बहाव हरेक दिन बढ्दै छ । यसले यहाँका बासिन्दालाई दैनिक व्यवहार चलाउन समस्या भएको हो । यहाँ तीन दिनदेखि सवारीसाधन छिर्न सकेका छैनन् । सवारीसाधनलाई पुमाखोलाले छेकेको छ । पश्चिम क्षेत्रबाट मात्रै यी दुई वडामा सवारीसाधन जाने सडक छ । अहिले वर्षाले त्यो सडक बन्द हुँदा समस्या भएको हो ।
यहाँबाट पूर्वतर्फ भएर सर्वसाधारण गाउँपालिकाको केन्द्र रुकुमकोट जान्छन । अस्थायी सदरमुकाम पनि रहेको रुकुमकोटमा हरेक दिन पुग्नुपर्ने हुन्छ । बैंकिङ कारोबार र अन्य कामका लागि बजार रुकुमकोट नै हो । यसअघि दुई पाङ्ग्रे विशेष गरी मोटरसाइकल वारपार गराएर पनि सर्वसाधारणले यात्रा गर्थे । अब त्यो पनि बन्द छ । झोलुंगे पुलमार्फत मोटरसाइल सानीभेरी नदी तार्थे र काम गर्थे । पहिरोले त्यो बाटो पनि रोकिदिएको हो । ‘हामी त गाउँमै थुनिएका पो छौं,’ सिस्ने–३ पाँगाका लोकेन्द्र खड्काले भने, ‘उता पनि सडक बन्द र यता पनि सडक बन्द छ ।’ कसैलाई आपत्विपत्मा अस्पताल लैजानुपरे असाध्यै असजिलो रहेको उनले बताए । यहाँबाट जिल्ला अस्पताल रुकुमकोट जान पनि समस्या छ । रुकुम पश्चिम भएर जान पनि पुमाखोला उर्लिएकाले अहिले त्यो तर्न सम्भव छैन । अबको पूरापूर तीन महिना यी दुई वडाका सर्वसाधारणका लागि धेरै असजिलो रहेको स्थानीयले बताए ।
सदरमुकाम जोड्ने गरी सानीभेरीमा मोटरेबल पुल बनाउन लागेको वर्षौं भयो तर त्यसले पूर्णता नपाउँदा दुःख झेल्नुपरिरहेको सिस्ने–४ कमला घर्तीले बताइन । ‘असाध्यै असजिलो गरेर काम चलाउँछौं,’ उनले भनिन्, ‘परेका बेला समस्या टार्न मुस्किल भइरहेको छ ।’ दुई वर्षअघि नै निर्माण सम्पन्न भइसक्नुपर्ने पुल अझै सकिएको छैन । पैदल हिँड्नुपर्ने र कतिले मोटरसाइकल गुडाउने झोलुंगे पुल पुग्ने बाटो पनि पहिरोले पुरेपछि गाउँ नै थुनिएको महसुस भएको घर्तीले बताइन ।