बाँकेको कोहलपुरमा केही दिन यता निषेधाज्ञा खुकुलो गरिएको छ । भारतसंग सीमा जोडिएको जिल्ला भएकोले बाँके कोरोना संक्रमणको जोखिम कायमै रहेको छ । निषेधाज्ञा खुकुलो भएसँगै सवारी साधन सञ्चालन, बजार क्षेत्र, सरकारी कार्यालय, बैंकका शाखाहरूमा भिडभाड हुन थालेको छ ।

यसका साथै भारत जाने नागरिकको संख्या पनि बढिरहेको छ । चालु आर्थिक वर्षको अन्त्यतिर रहेकाले विकास निर्माणका काम पनि धमाधम रुपमा चलिरहेका छन् । शैक्षिक गतिविधिका साथै विभिन्न स्वास्थ्यका शिविरहरू पनि सञ्चालनमा आउन थालेका छन् । कोरोना परीक्षणको दायरा पनि बढाइएको छ । निषेधाज्ञा खुकुलो भएसँगै जिल्लाभरि सार्वजनिक सवारी तथा निजी भाडाका गाडी स्वास्थ्य सुरक्षाका मापदण्ड पालन गरि सञ्चालनमा आएका हुन् ।

सार्वजनिक सवारी तथा निजी भाडाका गाडीमा सिट क्षमता अनुसार यात्रु बोकेर बिहान ७ बजेदेखि साँझ ७ बजे सम्म सञ्चालन गर्न पाइएका छन् । तर सवारी चालकले भने स्वास्थ्य मापदण्ड पालना गरेको पाइदैन । सबै कार्यालयहरूले सार्वजनिक सेवा नियमित रुपमा प्रवाह गर्नुपर्नेछ भने सार्वजनिक सेवा प्रवाह गर्दा स्थानीय तहहरूको आलोपालो मिलाई तथा स्वास्थ्य सुरक्षाका मापदण्ड पालना गरी गर्नुपर्ने आदेशमा उल्लेख गरिएको छ । सबै प्रकारका पसलहरू बिहान ७ देखि साँझ ६ बजे सम्म सञ्चालन हुनेछन् । होटेल तथा रेष्टुराहरूले होमडेलीभरी तथा टेकवे सेवा सञ्चालनमा छन् ।

यस्तै सबै प्रकारका सभा, सम्मेलन र गोष्ठीमा लगाएको रोक यथावत् राखिएको छ भने विवाह ब्रतबन्ध जस्ता धार्मिक कार्यमा बढीमा २५ जना सहभागी गराएर मात्रै गर्न पाइने प्रमुख जिल्ला अधिकारीद्वारा जारी आदेशमा उल्लेख गरिएको छ । तर भोज भतेर भने पूर्णरुपमा बन्देज गरिएको छ । कोरोना भाइरसका कारण बन्दाबन्दी कारण अस्तव्यस्त रहेको कोहलपुरका होटल व्यवसाय देखी सम्पूर्ण क्षेत्रहरुमा ठूलो प्रभाव परेको थियो । बन्दाबन्दी खुकुलो भएपछी दैनिक ज्यालादारीमा मजदुर गरेर जिपिकोपार्जन गर्ने मजदुरहरुलाई केही सहज भएको छ ।