कोहलपुर/कोहलपुर नगरपालिका सडकमा छाडिएका पशु चौपाया नियन्त्रण गर्न सम्बन्धित निकायले बेवास्ता गर्दा समस्या विकराल बन्दै गएको छ । स्थानीय सरकारले छाडा पशु चौपायाको व्यवस्थापन गर्न ठोस कदम चाल्न सकेको छैन ।

स्थानीयले आवाज उठाउँदा झिनो प्रयास भएपनि समस्याको स्थायी समाधान भने हुन सकेको छैन । छाडा पशु चौपायाका कारण कोहलपुर सडक खण्डमा दुर्घटनाको जोखिम बढ्दै गएको छ । कानुनले सडकमा छाडा पशु र चौपाया व्यवस्थित गर्ने अधिकार स्थानीय सरकारलाई दिएको छ । तर, घना शहरमा छाडा पशु चौपाया व्यवस्थित गर्नमा स्थानीय सरकार कोहलपुर उदासीन देखिएको छ । त्यसो त सवारीले पशु चौपायालाई सडकमै मार्ने र महिनौंसम्म सडक दुर्गन्धित हुने घटना नयाँ होइन ।

सम्बन्धित निकायको उदासिनताले बजार क्षेत्रमा पछिल्लोपटक बढेको छाडा चौपायाले सवारी अवागमनमासमेत समस्या पैदा गरेको सर्वसाधारणको गुनासो छ । सडकमा जथाभावी छाडिएका छाडा चौपायाले ट्राफिक आवागमनमा समस्या हुन थालेको छ ।अहिले कोहलपुर नगरपालिका विभिन्न चोक तथा सडकका छेउछाउमा छाडा चौपायाको हुल नै देखिन्छ । नगरपालिकाले छाडा चौपाया नियन्त्रणका लाखौँ बजेट खर्च गरिसकेको छ । छाडा चौपाया नियन्त्रणका लागि दिगो कार्य नहुँदा सडकमै जथाभावी गाईंवस्तु छाड्ने प्रवृत्ति बढेर गएपछि सडक दुर्घटना बढेको छ । यता इलाका प्रहरी कार्यालयका प्रहरीहरुलाई पनि छाडा चौपाय व्यवस्थापनमा हम्मेहम्मे परेको छ ।

अनधिकृत रूपमा सडकमा छाडिएका पशु चौपायाले सडक ढाकिदिँदा जोखिम मोलेर हिँड्नु पर्ने बाध्यता रहेको कोहलपुर नगरपालिका वडा नं. ११ का स्थानीय सुरेन्द्र केसी बताउँछन । ’बीच सडकमा छाडा पशुले बाटो छेकेर बस्छन्,’ उनले भने, ’कतिबेला दुर्घटनामा पर्ने हो ठेगान हुँदैन ।’ कोहलपुर नगरपालिकाले छाडा पशु चौपाया नियन्त्रणका लागि गम्भीर हुनुपर्ने स्थानीय केशब खत्रीको सुझाव छ । छाडा पशु चौपायाको बन्ध्याकरण गर्नुपर्ने र उचित व्यवस्थापन गर्नुपर्ने उनले बताए । हरेक वर्ष कोहलपुर नगरपालिका विभिन्न सडकखण्डमा छाडा चौपायको बिगबिगीका कारण सवारी दुर्घटना भइरहेका छन् । यस विषय तर्फ नगरपालिका मौन रहेको छ भने हरेक वर्ष कोहलपुर नगरपालिकाबाट लाखौँ रकम छाडा चौपाय व्यवस्थापन शीर्षकबाट खर्च भएको छ ।