२३ असार, काठमाडौं

प्रतिमान–नीमा स्मृति प्रतिष्ठान भैरहवाले अमेरिकास्थित प्रोजेक्ट होपसँगको सहयोगमा स्वास्थ्य सामाग्री ल्याउन सहमति गरेको छ। नेपालमा कोभिडको तेस्रो लहरको जोखिम बढिरहेका बेला प्रतिष्ठानले जुलाई महिनाभित्रै अमेरिकाको वासिङ्टनबाट ठूलो संख्यामा स्वास्थ्य सामग्री ल्याउन प्रोजेक्ट होपसँग सम्झौता गरेको हो।प्रतिष्ठानका कार्यकारी निर्देशक स्वाती थापाले स्वास्थ्य सामग्रीका लागि प्रोजेक्ट होपसँग सम्झौता गरिसकेको र चार्टर उडानबाटै भए पनि जुलाई भित्रै सामग्री नेपाल ल्याईने जानकारी दिईन्।

यसअघि लुम्बिनी प्रदेशका १२ वटै जिल्लाका अस्पतालमा स्वास्थ्य सामग्री उपलब्ध गराएको प्रोजेक्ट होपले अब आउने सामग्री भने नेपालका ७ वटै प्रदेशमा वितरण गरिने थापाले जानकारी दिइन्।यसैबीच प्रतिष्ठानका प्रतिनिधि र प्रोजेक्ट होप नेपालको लिड एमेलिया दुकोबस्कीले प्रधानमन्त्री केपी शर्मा ओलीसँग भेटघाट गरेका छन्।

प्रधानमन्त्री निवास बालुवाटारमा भएको भेटघाट कार्यक्रममा प्रतिष्ठानले गरेका कार्यक्रमबारे प्रधानमन्त्री ओलीलाई जानकारी गराइएको थियो।प्रतिष्ठानका अध्यक्ष विजया केसीले प्रतिष्ठानको स्थापना गर्नुको उद्देश्य र हालसम्म प्रतिष्ठानमार्फत भएगरेका कामको बारेमा जानकारी गराएकी थिइन्।प्रतिष्ठानका उपाध्यक्ष तथा पूर्व स्वास्थ्यमन्त्री दिपक बोहराले कोभिड–१९ को पहिलो चरणको संक्रमणदेखि नै प्रतिष्ठानले भैरहवास्थित आफ्नो भवन तथा भौतिक संरचनाहरु क्वारेन्टिन र होल्डिङ सेन्टर सञ्चालनको लागि सरकारलाई उपलब्ध गराएको जानकारी दिए।प्रतिष्ठानको भवनमा ९ महिना सञ्चालन गरिएको क्वारेन्टिनमार्फत २ सय ५० भन्दा बढी र होल्डिङ सेन्टरमार्फत २५ हजार बढीलाई सेवा प्रदान गरिएको बोहराले बताए।

त्यस्तै  कोभिडको दोस्रो चरणको महामारीमा लुम्बिनी प्रदेशका १३ वटा अस्पतालमा प्रोजेक्ट होपको सहयोगमा स्वास्थ्य सामग्री उपलब्ध गराएको थियो।भेटघाटमा प्रोजेक्ट होप नेपालको लिड एमेलिया दुकोबस्कीले प्रतिष्ठा प्रतिमान–नीमा स्मृति प्रतिष्ठानसँग दीर्घकालीन समन्वय गरेर नेपाल सरकारलाई सहयोग गर्ने बताइन्।उनले नेपालमा कोरोनाविरुद्धको खोपको अभाव रहेकाले प्रोजेक्ट होपले खोप उपलब्ध गराउन समेत पहल गर्ने बताइन्।

भेटघाटमा प्रधानमन्त्री ओलीले प्रोजेक्ट होपको सहयोग र प्रतिष्ठानको पहलप्रति धन्यवाद ज्ञापन गरेका थिए।।सेतोपाटी