कोहलपुर/ कोहलपुर ईलाका प्रहरी कार्यालयले आज स्टक प्रमाणिकरण नगरी विक्री वितरण गरिरहेका ट्रिप्पर, ट्रयाक्टर नियन्त्रणमा लिएको छ ।

स्टक प्रमाणिकरण गर्न नगरी अवैधरुपमा विक्री वितरण भैरहेको हुँदा ढुवानी गरिरहेका गाडिहरुलाई नियन्त्रण लिएको ईलाका प्रहरी कार्यालयका डिएसपी रविन्द्र खनालले बताउनुभएको छ । साथै उहाँले प्रमाणिकरण नगरी कुनै पनि नदीजन्य पदार्थको ढुवानी गरेमा नियन्त्रणमा लिइ आवश्यक कार्वाही गरिने बताउनुभयो ।

आज नियन्त्रण लिइएको नदीजन्य पदार्थ ढुवानी साधानहरुलाई नियन्त्रणमा लिइ आन्तिरक राजश्व कार्यालय बुझाउने तयारी गरिरहेको प्रहरीले जनाएको छ ।

आन्तरिक राजश्व क्षेत्रिय कार्यालय कोहलपुरका प्रमुख सरोज कुमार पोख्रेलले नदीजन्य पदार्थको स्टक प्रमाणीकरण नगरी विक्री वितरण गर्न नपाइने साथै राजश्व चुहावट या राजश्व छली गर्नेलाई आवश्यक कार्वाही गरिने बताउनुभएको छ । उहाँले नदीजन्य पदार्थ उत्खनन देखी विक्री वितरणलाई अनुगमन या नियामन गर्ने निकायहरु छन् सबैले आ–आफ्नो कर्तब्य पालना गरेमा राजश्व चुहावट तथा छली हुन नसक्ने बताउनुभयो ।

नदीजन्य पदार्थको कार्यविधि अनुसार नदीजन्य पदार्थलाई स्टक गरी राखिएको स्थान, परिमाण, जग्गाको लालपुर्जा या सम्झौता, वातावरणीय अनुकुल लगाएतका कागजात प्रमाणित गरेमा मात्र विक्री वितरण गर्न पाउने प्रावधान छ ।

कोहलपुर नगरपालिका, बैजनाथ गाउँपालिका, डुढुवा गाउँपालिका र राप्तीसोनारी गाउँपालिकामा समेत करोडौंको नदीजन्य पदार्थ अवैधरुपमा स्टक गरी राखिएको छ ।
स्टक प्रमाणीकरणका लागि पालिकाका प्रमुख तथा इन्जिनियरलाई मोटो रकम दिएर प्रमाणिकरण गर्न सक्ने जानकारहरु बताउँछन् ।