नेकपा एमालेका अध्यक्ष केपी शर्मा ओली समूहका नेताहरुले मिलेर अघि बढ्न वरिष्ठ नेता माधवकुमार नेपाललाई आग्रह गरेका छन् । बिहान नेपाल निवास कोटेश्वरमा पुगेर उनीहरुले मिल्नुको विकल्प नरहेकोले दुईजना भेटेर कुरा गर्न र मिलेर अघि बढ्न आग्रह गरेका हुन् ।

नेता नेपाललाई भेटेर फर्किएपछि ओली समूहका नेता सुवासचन्द्र नेम्वाङले भन्नुभयो, ‘हामीले तपाईँहरु मिल्नुस्, योभन्दा अर्को विकल्प छैन भनेर भन्यौँ । दुवै जना भेटेर छलफल गरेर समस्याको समाधान गर्न आग्रह गर्यौँ ।’

वरिष्ठ नेता नेता नेपाललाई भेट्न एमालेका नेताहरु नेम्वाङसहित उपमहासचिव विष्णु पौडेल र शंकर पोखरेल कोटेश्वर पुगेका थिए । जवाफमा वरिष्ठ नेता नेपालले आफ्नो समूहमा छलफल गरेर मात्रै निर्णय लिने बताउनुभयो । त्यसबाहेक उहाँले अरु कुनै प्रतिक्रिया नजनाउनुभएको नेता नेम्वाङले बताउनुभयो ।

एमालेको केन्द्रीय कमिटी बैठकले भोलि बेलुकासम्म कांग्रेस सभापति शेरबहादुर देउवालाई प्रधानमन्त्री बनाउन गरेको हस्ताक्षर फिर्ता लिने समय दिएको छ । तोकिएको समयसम्म पनि हस्ताक्षर फिर्ता नभए एकताको औचित्य सकिने प्रधानमन्त्री एवम् पार्टी अध्यक्ष ओलीले बताइसक्नुभएको छ ।

प्रतिनिधि सभा विघटनको कदम गल्ती भएको भनेर स्वीकार नगरेसम्म आफूहरुले शेरबहादुर देउवालाई दिएको समर्थन फिर्ता नगर्ने खनाल–नेपाल समूहका नेताहरुले बताउँदै आएका छन् । यसअघि हिजो दुवै पक्षका ६ जना नेताहरुबीच ललितपुरको समिट होटलमा वार्ता भएको थियो । वार्ताका क्रममा सर्वोच्च अदालतमा बुझाइएको हस्ताक्षरलाई सहमतिको पूर्वशर्त बनाउने सहमति भएको थियो ।