धर्मराज आचार्य
सुर्खेत / कर्णाली प्रदेशसभाको बैठकमा निलम्बित तीन सांसद प्रवेश गरेपछि एमाले सांसद आक्रोशित भएका छन ।

एमाले संसदीय दलका नेता यामलाल कंडेलले संसदीय व्यवस्थामा एमाले सरकार बाहिर रहेको र एक महिना निलम्बन गरेका मन्त्री संसदमा सहभागी हुनु संसदको मर्यादा विपरित भएको भन्दै वैठकमा आक्रोश व्यक्त गर्नु भयो ।

एमालेले सरकारलाई समर्थन नगरेको र शुरुमा फ्लोक्रस गरेर सरकारमा सहभागी भएपनि अहिले एमाले सांसद रहेकाले सरकारबाट फिर्ता हुन बारम्बार आग्रह गर्दा नआएपछि दोस्रो पटक एक महिनाको लागि निलम्बन गरेको एमालेको दावी छ ।

यता संसद सचिवालयले गत असार ११ गते नेकपा एमाले संसदीय दलले निलम्बन गरेको जानकारी सहितको सुचना जारी गरेको थियो । तर आजको बैठकमा एमालेबाट निलम्बित भूमि व्यवस्था कृषि तथा सहकारी मन्त्री कुर्मराज शाही, उद्योग पर्यटन वन तथा वातावरण मन्त्री नन्दसिंह बुढा र भौतिक एवम शहरी विकास मन्त्री अम्मरबहादुर थापा सहभागी भएपछि एमालेले आपत्ति जनाएको हो । एमालेले उनीहरूलाई संसदीय काम र कारवाहीमा सहभागी गराउन नपाइने माग गर्दै आएको छ ।

गत वैशाख ३ गते फ्लोरक्रस गरेर संसदीय दलको निर्णयविरुद्ध जाने चारैजनालाई एमालेले कारवाही गरेको हो । संसदीय दलको सदस्य र पार्टीको साधारण सदस्यबाट समेत हटाएको नेता कंडेलले बताउनु भयो ।

आज बसेको बैठकमा पनि एमालेका सांसदहरू उठेर अवरुद्ध गरेपछि अर्को बैठक असार १८ गते दिउँसो दुई बजे बस्ने गरी स्थगित भएको सभामुख राजबहादुर शाहीले बताउनु भयो । असार १ पछि बैठक निरन्तर अवरुद्ध हुँदै आएको छ ।