दाङ / कोरोना माहामारी र पत्रकारिता विषयक दुई दिने अन्तरक्रिया कार्यक्रम आज देखि दाङको भालुबाङमा शुरु गरिएको छ ।

नेपाल पत्रकार महासंघ लुम्बिनी प्रदेश समितिको आयोजनामा गरिएको उक्त अन्तरक्रिया कार्यक्रममा लुम्बिनी प्रदेशका ११ जिल्लाका पत्रकारहरुको सहभागिता रहेको छ ।

अन्तरक्रिया कार्यक्रममा कोरोना महामारीमा पत्रकारले भोगेका समस्या तथा पत्रकारको उपचारमा देखिएका चुनौतीहरुका बिषयमा छलफल गरिएको थियो ।

कार्यक्रममा बोल्दै नेपाल पत्रकार महासंघका केन्द्रिय अध्यक्ष बिपुल पोखरेलले कोरोना महामारीमा पनि पत्रकारले आफ्नो ज्यानको प्रवाह नगरी जनतालाई सही सुचना दिएको बताउनुभयो ।

कोरोना विरुद्धको लडाईमा बेथिति र बदनियत धेरै भइरहेको भन्दै त्यसलाई बाहिर ल्याउनुपर्ने कर्तव्य पनि पत्रकारहरुको रहेको बताउनुभयो । पत्रकारिता पेशा संकटमा परेमा आम नागरिक सूचनाबाट अलग हुने खतरा रहने बताउदै कोरोनाले नेपालको मिडिया उद्योग समेत ठूलो संकट परेको बताउनुभयो ।

यो महामारीको संकट सबै मिलेर सामाना गर्ने र पत्रकारहरुका लागि कोरोना खोपको ब्यबस्था गर्ने समेत प्रतिबद्धता जनाउनुभयो ।