मुम्बई । अभिनेता फरहान अख्तरले हालै चलचित्र ‘तुफान’ को नयाँ रिलिज मिति सार्वजनिक गरेको छ । मे २१ मा रिलिज मिति तोकिएको यो स्पोर्ट्स ड्रामा चलचित्र कोरोना महामारीको दोस्रो लहरका कारण स्थगित भएको थियो । 

इन्डियन एक्सप्रेसका अनुसार चलचित्र ‘तुफान’ अब जुलाई १६ मा अमेजन प्राइमेमा रिलिज हुँदैछ । रिलिज मिति सार्वजनिक गर्दै फरहानले ट्विटमा लेखेका छन्, “हाम्रो देशका सुन्दर व्यक्तिहरूको माया, नम्रता र लड्ने आत्मबलका कारण हाम्रो चलचित्र ‘तुफान’ यही जुलाई १६ मा रिलिज हुँदैछ ।”

गत महिनामात्रै फरहानले एउटा विज्ञप्तिमार्फत कोरोनाले सिर्जना गरेको किठन समयमा आफू समाजका सहयोगका लागि प्रतिबद्ध रहेकाले चलचित्रको रिलिज मिति पोस्टपोन्ड गर्ने बताएका थिए । 

राकेश ओमप्रकाश मेहरा निर्देशित ‘तुफान’ मा अभिनेता फरहान एक राष्ट्रिय स्तरका बक्सिङ खेलाडीको भूमिका निभाउँदै छन् । फरहानका साथै यस चलचित्रमा मृणाल ठाकुर, परेश रावल, सुप्रिया पाठक कपुर र हुसेन दलालको पनि अभिनय रहेको छ ।