काठमाडौं । सरकारले आगामी जेठ ३२ गतेसम्म लकडाउन यथावत राखेको छ । तर अब लकडाउन हिजो जस्तो कडा भने हुने छैन । यसको मोडालिटी परिवर्तन हुने सम्भावना देखिएको छ ।

प्रधानमन्त्री केपी शर्मा ओलीले देशवासीका नाममा सम्बोधनका क्रममा नयाँ मोडालिटीमा कोरोना भाइरसविरुद्धको संघर्षमा जाने बताएका थिए । देशमा अब उद्योगहरु र विकास निर्माणका कार्यहरु अघि बढ्ने प्रधानमन्त्रीले उल्लेख गरेका थिए । कोरोनाको जोखिम न्यूनीकरण गर्न सुरक्षाको नीति अबलम्बन गरेर आर्थिक गतिविधिहरु अघि बढाउने पनि प्रधानमन्त्रीले उल्लेख गरेका थिए । विश्वस्त स्रोतका अनुसार सरकारले सार्वजनिक यातायात र शैक्षिक संस्था अझै केही समय बन्द गर्नेछ । तर, शैक्षिक कार्यक्रमको विकल्पका रुपमा अनलाइन र दुर शिक्षा शुरु गर्ने तयारी गरेको छ । यसका लागि शिक्षा मन्त्रालय लागिपरेको छ ।

उद्योगहरु सञ्चालनमा आउने छन जसका लागि उद्योगी स्वंयमले सुरक्षाको जिम्मेवारी लिनुपर्नेछ । कोरोनाकै कारण विदेशमा रोजगारी गुमाउन बाध्य भएका अलपत्र आफ्ना नागरिकलाई स्वदेश फिर्ता बोलाएर रोजगारीमा लगाउने सरकारको तयारी छ । उनीहरुलाई निर्माण लगायतका विभिन्न क्षेत्रमा रोजगारीमा लगाउने सरकारले तयारी थालेको छ । कोरोनाविरुद्धको लडाइँ सामना गर्नका लागि सरकारले निर्माण कार्यमा गति दिने सम्भावना देखिएको छ । यसका साथै राष्ट्रिय गौरवका र अन्य विकासका आयोजनाहरुलाई सरकारले प्राथमिकतामा राखेको छ ।

कोरोना भाइरसको महामारीले जनतालाई झनै समस्या देखिएपछि सरकारले निश्चित मापदण्ड तोकेर आर्थिक गतिविधि सञ्चालन गर्ने तयारी गरेको हो ।