जाजरकोट । कोरोना भाइरसको महामारीका कारण जिल्ला बाहिरबाट आउने मानिसहरुका कारण सबैमा सन्त्रासको वातावरण सृजना भएको छ । जाजरकोट र सुर्खेतको सीमाना रहेको शिवालय गाउँपालिका–१ छेडाबजारमा रहेका प्रहरीलाई यसको त्रास झनै रहेको छ ।

विभिन्न ठाउँबाट आउने मानिसहरुको मुख्य विन्दु यही हो । यहाँबाट दिनमा भन्दा पनि रातिमा अत्याधिक मानिसहरु आउने गर्छन । त्यहाँ चेकजाँचका लागि खटिएका प्रहरीसँग व्यक्तिगत सुरक्षा सामग्री (पीपीइ) को अभाव छ । बाहिरबाट भोकै आएका मानिसहरु र क्वारेन्टाइनमा बस्न नमान्ने मानिसहरुले प्रहरीलाई सास्ती दिएको जिल्लाका प्रहरी नायब उपरीक्षक किशोरकुमार श्रेष्ठले जानकारी दिए ।

उनले भने–“बाहिरबाट आएका व्यक्तिलाई होटलमा समेत राख्न नमान्दा अर्को हैरान हुँदै आएको छ । प्रहरीले आफ्नो तलबबाट स्थानीय पसलबाट चाउचाउ किनेर नास्ता खुवाई नजिकै रहेको ओडारमा सुताउने गरेको छ ।”

रातिमा आउने मानिसका कारण त्यहाँ जोखिम रहेको प्रहरीले बताएको छ । यसका साथै प्रहरीले गाउँपालिकालाई यसको व्यवस्थापनका लागि व्यवस्थापकको व्यवस्था गरिदिन पनि आग्रह गरेको छ । चेकजाँचका लागि त्यहाँ कार्यरत प्रहरीको स्वास्थ्य अवस्था पनि चेकजाँच गर्न प्रहरीले आग्रह गरेको छ ।

जाजरकोट, पश्चिम रुकुम, डोल्पालगायत जिल्लाका मानिस आउने मुख्य नाका रहेको छेडाबजारमा प्रहरीलाई दैनिक हैरान भएको स्थानीय पूर्णसमिर महताराले जानकारी दिए । उनले भने, “प्रहरीले क्वारेन्टिनमा बस्नुपर्ने भनेर रोक्न खोज्दा प्रहरीमाथि नै आक्रमण गर्न खोज्छन् । यस्तो अवस्थामा कसरी काम गर्ने रु बाहिरबाट आउने मानिसहरुको व्यवस्थापनका लागि निकै चुनौती भएकाले गाउँपालिकाबाट यसको व्यवस्थापनका लागि पहल गर्नुपर्ने स्थानीयको माग छ । यसका साथै त्यहाँ क्वारेन्टाइनको व्यवस्थापन गर्न पनि माग पहरी र स्थानीयले माग गरेका छन ।