काठमाडौं । रोजगारीका क्रममा भारतमा कार्यरत रहेका करिब १० हजारभन्दा बढी नेपालीहरु ५ दिनको अवधिमा पश्चिमी सीमानाका गड्डाचौकीबाट नेपाल भित्रिएका छन ।

कञ्चनपुर प्रशासनले भारतबाट घर फर्किएका नेपालीलाई गत सोमबारबाट गड्डाचौकी सीमानाका भएर आउने बाटो
खुलाएपछि करिब १० हजारभन्दा बढी नेपाली नेपाल भित्रिएका हुन । जिल्ला प्रशासन कार्यालय कञ्चनपुरले गत सोमबारबाट गड्डाचौकी सीमा नाका हुँदै १० हजारभन्दा बढी नेपाली नेपाल भित्रिएको जानकारी दिएको छ ।

कोरोनाको जोखिमका कारण भारतका विभिन्न स्थानबाट जथाभावी धमाधम नेपाल भित्रिन थालेपछि स्थानीय प्रशासनले नाका खोल्ने निर्णय गरेको हो । गड्डाचौकी सीमानाका खुला गरेको पहिलो दिन २ हजार ६३७ जना, गत मंगलबार ६९४, बुधबार १ हजार ५८६ नेपाली स्वदेश फर्किएका थिए । यस्तै बिहीबार २ हजार ४०५ र शुक्रबार २ हजार ७७८ नेपाली गड्डाचौकी भएर नेपाल भित्रिएका छन् ।

जिल्ला प्रशासन कार्यालय गड्डाचौकी सीमानाका प्रयोग गरेर ६०२ जना भारतीय आफ्नो देश गएको पनि जनाइएको छ । प्रशासन कार्यालयका अनुसार शुक्रबार १७८ जना भारतीय गएका छन् । यस्तै बिहीबार १७१ र बुधबार २५४ जना गड्डाचौकी भएर भारत गएका थिए । स्थानीय प्रशासनले गत सोमबारबाट नेपालीलाई भित्र्याए पनि भारतीयलाई बुधबारबाट मात्रै बाहिरिन दिएको थियो ।

नेपाल भित्रिने र बाहिरिनेहरुका लागि जिल्ला प्रशासन कार्यालयले बिहान ६ बजेदेखि १० बजेसम्म नाका खुल्ला राखिएको बताएको छ ।