काठमाडौं । गत जेठ १० गते रुकुम पश्चिमको चौरजहारी नगरपालिका–८, को सोतीमा भएको घटनामा परी बेपत्ता भएका जाजरकोटका सञ्जु विकको शव भेरी नदीमा फेला परेको छ । सशस्त्र प्रहरी सहितको गोताखोर टोलीले उक्त शव भेट्टाएको हो ।

चौरजहारी नगरपालिका–८ को सोती गाउँका स्थानीयको कुटाइबाट ज्यान जोगाउन भेरी नदीमा हाम फालेका नवराज विक, गणेश बुढा मगर, टिकाराम सुनार र सञ्जु विक मृत अवस्थामा फेला परेका थिए । उक्त घटनामा परी ज्यान गुमाउनेको संख्या ५ पुगेको छ । ज्यान जोगाउन भेरी नदीमा हाम फालेका मध्ये १ जना अझै बेपत्ता छन । उनको खोजी कार्य जारी रहेको छ ।