काठमाडौं । प्रसिद्ध गीतकार तथा मुक्तककार रत्नशमशेर थापाको ८१ वर्षको उमेरमा निधन भएको छ । बिहीबार दिउँसो १२ बजे नर्भिक अस्पतालमा उपचारका क्रममा उनको निधन भएको पारिवारिक स्रोतले बताएको छ ।

गीतकार थापका ‘ए कान्छा ठट्टैमा यो वैँस जान लाग्यो’, ‘जाग–लम्क–चम्क हे नौजवान हो’, ‘विछोडको पीडा नसकी खप्न’, ‘आँखाको भाखा’, ‘गोरेटो त्यो गाउँको’, ‘घुम्तीमा नआऊ है’ लगायत गीत चर्चित छन् । थापाका ‘चक्लाभरिको घाम’, ‘ताराका काँचा रङ’ (कवितासङ्ग्रह), ‘ओभानो सिउँदो’, ‘रुझेका परेला’ (गीतसङ्ग्रह) प्रकाशित छन् ।

उनले देवकोटा साहित्य पुरस्कार, युगकवि सिद्धिचरण काव्य पुरस्कार, मुक्ति पुरस्कार, रेडियो नेपालबाट सम्मान (गीतमा), साधना सम्मान, लाइफटाइम एचिभमेन्ट अवार्ड (हिट्स एफ।एम।), भीमनिधि राष्ट्रिय प्रतिभा पुरस्कार, छिन्नलता पुरस्कार, हरिहर शास्त्री–सावित्रीदेवी साहित्य पुरस्कार प्राप्त गरेका छन् ।