काठमाडौं । नेपालमा कोरोना संक्रमणलाई जितेर घर फर्किनेहरुको संख्या १८३ पुगेको छ । आज मात्रै ३४ जनाले भाइरसबाट छुटकारा पाएको स्वास्थ्य तथा जनसंख्या मन्त्रालयले जनाएको छ ।

निको हुनेहरुमा प्रदेश नम्बर १ मा ३०, प्रदेश नम्बर २ मा ९७, बागमती प्रदेशमा ११ र गण्डकी प्रदेशमा २ जना अस्पतालबाट डिस्चार्ज भएर घर फर्किएका छन । यस्तै प्रदेश नम्बर ५ मा ३८ र सुदूरपश्चिम प्रदेशमा ५ जना डिस्चार्ज भएका छन् । बुधबार मात्रै नारायणी अस्पतालबाट २८ जना, कोसी अस्पतालबाट ४ र सुशील कोइराला पर्खर क्यान्सर अस्पतालबाट २ जना डिस्चार्ज भएका छन् ।

नेपालमा भाइरसबाट ८८६ जना संक्रमित भएका छन । भाइरसका कारण ४ जनाको मृत्यु भैसकेको छ । संक्रमितहरुको देशका विभिन्न अस्पतालमा उपचार भैरहेको छ ।